Eń ınnovatsııalyq oqýshylar, stýdentter, startaperler, BAQ jáne aımaq anyqtalady - QR IDM
ASTANA. QazAqparat - 2018 jyldyń 17 maýsymy men 17qyrkúıegi aralyǵynda Ulttyq ınnovatsııalyq konkýrsqa ótinishter qabyldanady, dep habarlaıdy QazAqparat QR IDM resmı saıtyna silteme jasap.
7 maýsymda QR IDM Medıa-ortalyǵynda ótken brıfıngte Tehnologııalyq jáne ınnovatsııalyq damý departamenti dırektorynyń orynbasary Nesipgúl Esenbaeva men «TDUA» AQ Basqarma tóraǵasynyń orynbasary Dáýren Sábdenov konkýrstyń bastalǵandyǵyn jarııa etti.
Atalmysh sharany Qazaqstan Respýblıkasy Investıtsııalar jáne damý mınıstrligi Tehnologııalyq jáne ınnovatsııalyq damý departamentiniń qoldaýymen «Tehnologııalyq damý jónindegi ulttyq agenttik» AQ ótkizedi.
Konkýrs ınnovatsııalyq jáne tehnologııalyq damýǵa suranysty arttyrýǵa, halyqtyń ınnovatsııalyq belsendiligin yntalandyrýǵa, ınnovatsııalyq qyzmetti nasıhattaýǵa, tehnologııalyq kásipkerlik pen komandalyq jumystardy damytýǵa, tehnologııalyq kásipkerlikti júrgizýdegi quzyretterdi damytýǵa, sondaı-aq, ǵylym men ınnovatsııalar taqyrybynda jazatyn jýrnalıster qoǵamdastyǵyn qalyptastyrýǵa, osy taqyrypty nasıhattaýǵa jáne ınnovatsııalyq protsesterdi buqaralyq aqparat quraldarynda jarııalaý sapasyn arttyrýǵa baǵyttalǵan.
Konkýrstyń jalpy júlde qory 28 699 000 teńge.
Konkýrs bes nomınatsııa boıynsha ótedi: joǵary synyp mektep oqýshylary, stýdentter, startaperler, jýrnalıster jáne aımaqtar arasynda uıymdastyrylady.
Bıyl mektep oqýshylary, stýdentter, startaperler arasyndaǵy básekelestik tehnologııalyq kásipkerliktiń praktıkalyq daǵdylaryn damytýǵa baǵyttalǵan.
Bul nomınatsııalarǵa qatysý úshin komanda qurý kerek jáne bıznes-jospar men top músheleri róliniń sıpattamasy arqyly áleýmettik mańyzdy tapsyrmanyń tehnologııalyq sheshiminiń beıne-tanystyrylymyn daıyndaý qajet.
Atalǵan nomınatsııalar boıynsha jeńimpazdar ınnovatsııalyq saladaǵy jetekshi elderdiń birinde tehnologııalyq kásipkerlik boıynsha oqý kýrsynan ótýge múmkindik alady. Ekinshi jáne úshinshi oryn alǵandar qomaqty qarjylaı syılyqqa ıe bolady.
Jýrnalıster arasyndaǵy konkýrsqa qatysý úshin 2017 jyldyń 1 qazanynan bastap 2018 jyldyń 1 qyrkúıegine deıin respýblıkalyq nemese aımaqtyq BAQ betterinde ınnovatsııalyq taqyryptar boıynsha jarııalanǵan materıaldardy usyný qajet.
Baıqaýǵa BAQ barlyq túrleri qatysa alady. Bul sanattaǵy jeńimpazdar men júldegerler qomaqty aqshalaı syılyqtarǵa ıe bolady.
Mektep oqýshylary, stýdentter, startaperler men jýrnalıster arasynda nomınatsııalar boıynsha jeńimpazdar men júldegerlerdi qoǵam qaıratkerleri, depýtattar, ınnovatsııalyq sarapshylar, BAQ jetekshileri, halyqaralyq uıymdardyń ókilderi jáne t.b kiretin táýelsiz saraptamalyq komıssııa anyqtaıdy.
Eń ınnovatsııalyq aımaq 2017 jylǵy ınnovatsııalar týraly statıstıkalyq derekterdiń qorytyndysy boıynsha anyqtalady.
Konkýrsqa qatysý sharttary men ótinim berý múmkindigi týraly tolyq aqparat konkýrstyń resmı betinde - https://natd.gov.kz/activity/nic/ saıtynda kórsetilgen.
