Eń dámdi qymyz tek Qazaqstanda - Eýropanyń áıgili qymyz óndirýshisi Gans Tsolman
ALMATY. 2 maýsym. QazAqparat /Názıra Eleýhan/ - Qymyzdy Eýropa halqy jaqsy biledi, biraq onyń paıdalylyǵy Germanııada ǵylymı túrde dáleldenbegen. Meniń Qazaqstan jerine kelýimniń de maqsaty osy - Eýropa men Germanııaǵa qazaqstandyq áriptesterimmen birge qymyzdyń paıdalylyǵyn dáleldeý.
Bul týraly Eýropanyń áıgili qymyz óndirýshisi Gans Tsolman QazaAqparat tilshisine bergen suhbatynda aıtty.
Onyń aıtýynsha, qymyzdy 1959 jyldan beri Germanııa halqy jaqsy biledi. «Búginde ol Frantsııa, Avstrııa, Gollandııa elderinde tanymaldylyqqa ıe. Eýropanyń kóp elderinde qymyz óndirisi keń taralǵan. Halyq kóbine qymyzdy emdik maqsatta ǵana qoldanady. Qazir biz taza qymyzdy shyǵarýmen qatar, qymyzdan jaqsy balalar súti men taǵamdaryn jasaýdy qolǵa alýdamyz, negizinen qymyz untaǵynan ár túrli kosmetıkalardy, sportshylarǵa arnalǵan áldendirýshilerdi de shyǵaramyz. Germanııada 1 lıtr qymyz - 7-10 eýrodan joǵary turady, al keptirilgen qymyz 20 eýro shamasynda. Jyldan jylǵa Eýropada qymyzǵa degen suranys artyp keledi»,-deıdi ol.
Gans Tsolmannyń aıtýynsha, Germanııa men Qazaqstannyń qymyzy eki túrli. «Onyń ár túrli bolý sebebi, bıeni qandaı jerde baptap, ustaýyna baılanysty. Biz Germanııada jylqylardy arnaıy orynda ǵana ustasaq, Qazaqstanda olar jaılaýda, ár túrli jerde jaıylady, ıaǵnı ár túrli shóp jeıdi. Sondyqtan da Qazaqstan qymyzdarynyń dámi de ár túrli jáne qymyz sizderde ár túrli tehnologııalarmen óndiriledi eken. Al, bizde memlekettik standart bar, sondyqtan qymyzdyń dámi bárinde birdeı. Biz de jaıylymdar bar, biraq ondaı jerler bizde birinshiden az, ekinshiden shópterdiń ártúrliligi de az»,-dedi ol.
Gans Tsolmannyń pikirinshe eń dámdi qymyz tek Qazaqstanda. «Men Monǵolııanyń jáne basqa elderdiń qymyzynyń dámin kórdim, biraq eń dámdisi Qazaqstandiki. Qymyz Qazaqstannyń Otany bolyp tabylady emes pe, sondyqtan sol atqa osylaısha laıyq bolýy kerek. Meniń bir aıtarym, Qazaqstan qymyz óndirýshileri nasıhattyq jumysyn ulǵaıtyp, taratýdy kóbeıtýi kerek»,-deıdi ol.
Onyń aıtýynsha, sharýashylyq 1959 jyldan bastap jumys isteıdi. «Ol sharýashylyqty meniń atam bastaǵan. Atamyz Keńes dáýirinde Qazaqstanda túrmede jatqanda týberkýlez aýrýyna shaldyǵady, ony túrmeden shyǵaryp tastaǵan soń qazaq dosy qymyzben emdep ajaldan aman alyp qalady. Qymyzdyń emdik qasıeti arqasynda ol qulan-taza emdelip shyǵady. Jazylǵan soń atamyz elge Germanııaǵa oralyp, onda qymyz óndirýmen aınalysyp, ony tanytyp, adamdardyń saý bolýy úshin jumys jasady. Búginde biz onyń balalary atamyzdyń isin jalǵastyrýshylarmyz. Sharýashylyǵymyzdyń 400 gektardan asa jeri bar. Onda 400 bas jylqy ustaımyz, onyń 200-i saýylatyn bıe. Meniń aldaǵy maqsatym - qazaqstandyq qymyzdy odan ári tereńirek zerttep, ony Eýropaǵa nasıhattaý, shyǵarý»,-dedi ol.
Gans Tsolman - Germanııadaǵy eń iri qymyz óndirýshi, qymyzdy Evropada nasıhattap júrgen tuńǵysh shet eldik.
