Eń birinshi júrektiń jylýy men meıirim kerek — áleýmettik qyzmetker
AQTÓBE. KAZINFORM — Qazan aıynyń sońǵy jeksenbisi — Áleýmettik qamsyzdandyrý qyzmetkerleri kúni. Kazinform tilshisi egde tartqan adamdarǵa, múgedektigi bar adamdarǵa qamqorlyq kórsetip júrgen Gúlmıra Týleýbaevanyń bir kúnimen tanysty.
Dúkenge birge baryp, taza aýada serýendeımiz – áleýmettik qyzmetker
Áleýmettik qyzmetkerdiń jumysy tańǵy saǵat 8:30–da bastalady. Gúlmıra Týleýbaeva óz qamqorlyǵyna alǵan 10 adamǵa aptasyna úsh ret barady. Eki saǵatta úı jınaıdy, as úı jumystaryna qolǵabys etedi, qajet kezde dúken, dárihanaǵa baryp, qamqorlyǵyndaǵy adammen serýendeıdi.
— Ózim medıtsına mamandyǵyn alǵanymmen aýylda bul salada jumys istemedim. Keıin balabaqshada medbıke bolyp eńbek etip, qalaǵa kóshken soń úıde otyrdym. Eńbekke aralasqym kelgen soń jumyspen qamtý bólimine baryp, osy salaǵa keldim. Bul 2008 jyl boldy. Sodan beri neshe túrli taǵdyrdy kórdim, tanystym. Ómirdiń soqpaǵy kóp, shyǵar shyń da jeterlik. Egde adamdar eńbekpen ósken. Olar tynymsyz jumys istedi, táýelsizdiktiń alǵashqy jyldarynda aıaqqa turdy. Sóıtip júrip urpaq tárbıeledi, ósirdi. Bárin de bizge aıtyp otyrady. Tyńdap, kórip, sabaq aldym, — dedi Gúlmıra Týleýbaeva.
Ár kúni — keste. Qamqorlyǵyndaǵy adamnyń úıine kirgen sátten josparǵa saı úı jınap alady. Bólme kóp bolsa, bárin qamtý úshin jumysty birneshe kúnge bóledi. Keıin as bólmesinde tamaq ázirleýge, qajet kezde ydys jýýǵa kómektesedi. Sonymen birge shomyldyrý, massaj jasaý, qan qysymyn ólshep, jaǵdaıyn suraý da mindetine kiredi. Munyń bárinen ótken soń tizim boıynsha ózge mekenjaıǵa baryp, dál osy tártippen kúnine 8 saǵatty ótkizedi.
— Bizdiń jumysta egde tartqan adamdar, múgedektigi bar adamdar bolǵan soń eń birinshi júrektiń jylýy, meıirim kerek. Bir aýyz jyly sózimizge balasha máz bolady. Otbasynyń bir múshesi sekildimiz. Bar syryn aıtady, júregindegi qaıǵy-muńyn da shertedi, — dedi ol.
Týǵan apamdaı senemin — áleýmettik kómek alýshy
Lázzat Imanalına 2008 jyly jol-kólik apatyna túsip, múgedektik rásimdedi. Ol kezde janyndaǵy joldasy qoldaý kórsetti. Arada bes jyl ótkende joldasy ınsýlt alyp, qozǵalysy qıyndady. Ári balasy da kishkentaı boldy. Sol shaqta áleýmettik qyzmetshi surap, janyna aldyrdy. Gúlmıra Týleýbaevamen tez til tabysyp, baýyr basyp ketip, qazir biri apa, biri sińli boldy.
— Óte keremet, jany jaısań, únemi kúlip júretin jan. Biz túrli adambyz. Ózim arbada otyramyn. Al ol bir kúnde birneshe adamǵa barady. Kempir bar, shal bar. Biri aýyryp otyrsa, biri renjip otyrady. «Ne boldy? Jaǵdaıyń qalaı?» dep surap otyrady. Bir aýyz jyly sózdiń ózi adamǵa demeý beredi. Ózim jaqsy til tabysyp kettim. Týǵan apamdaı senemin. Bar sharýany zor qamqorlyqpen isteıdi. Syrymyzdy bólisemiz, renishimdi de aıtyp otyrady. Shynymdy aıtsam, Gúlmıra apa zeınet jasyna jaqyndap qaldy. Keıin kim keledi dep oılaımyn, ýaıymdaımyn. Al bul kisilerge eskertkish qoıý kerek, — dedi áleýmettik kómek alýshy Lázzat Imanalına.
Onyń aıtýynsha, bireýdiń úıin jınaý, aıtqanyn istep, járdem berýge ekiniń biri barmaıdy, kónbeıdi. Ony tek júregi keń adam atqara alady.
— Jalǵyzbasty adamdarǵa, biz sııaqty múgedektigi bar adamdarǵa áleýmettik kómek berip otyrǵany úshin elimizge alǵys aıtamyz. Qajetti zattarymyzdyń bárin alyp otyrmyz, — dedi ol.
Lázzat Imanalına — jaıdary jan. Án men bıge áýes, mádenı sharalarǵa qatysqandy unatady. Qalada kontsert bolsa, teatrda jańa qoıylym sahnalansa, qalmaıdy. Sonymen birge aldaǵy ýaqytta túrli sporttyq úıirmelerge qatysýdy josparlap otyr. Alǵashynda bı úıirmese unatqanymen, qalada arbada otyrǵandar kirip-shyǵýy ońtaıly orynnan usynys keziktirmedi.
Qalada myńǵa jýyq qyzmet alýshy bar — Áleýmettik járdem ortalyǵy
Aqtóbede áleýmettik qyzmet kórsetý ortalyǵy 90-jyldardyń sońynda ashyldy. Ol kezde Zeınetkerlerge áleýmettik qyzmet kórsetýge arnalǵan terrıtorıaldy ortalyq bolyp quryldy. 2005 jyldan bastap múgedektigi bar balalarǵa úı jaǵdaıynda arnaýly áleýmettik qyzmet kórsetý qyzmeti qosyldy. Al 2014 jyly Áleýmettik járdem ortalyǵy bolyp ózgerdi.
— Ortalyq Aqtóbe qalasynda turatyn eńbek jasyndaǵy jaqyn týystary (balalary jáne nemereleri — red.) joq jalǵyzbasty qarttarǵa, І-ІІ top múgedektigi bar azamattarǵa jáne múgedektigi bar balalarǵa áleýmettik qyzmet kórsetedi. Qalada 927 áleýmettik qyzmet alýshy adam tirkeldi. Onyń ishinde jalǵyzbasty qarttar men І, ІІ-top múgedektigi bar azamattar sany — 736 adam, múgedektigi bar bala — 191. Ortalyqta jumys isteıtin 116 áleýmettik qyzmetkerdiń 80-ni jalǵyzbasty qarttar men І, ІІ-top múgedektigi bar azamattarǵa, al 36-sy múgedektigi bar balalarǵa úıde qyzmet kórsetedi, — dep habarlady Áleýmettik járdem ortalyǵy.
Áleýmettik qyzmetkerler turmystyq, medıtsınalyq, psıhologııalyq, pedagogıkalyq, eńbek, ekonomıkalyq, quqyqtyq, mádenı kómek kórsetedi.
— Áleýmettik qyzmetkeraptasyna kem degende eki ret qyzmet alýshyǵa barady. Ol mindetti túrde táýliktiń kúndizgi ýaqyty bolýy tıis. Úı nemese páter jınaıdy, tamaq pisirýge kómektesedi, azyq-túlik, dári-dármek satyp ákelip beredi. Sonymen birge kommýnaldyq tólemderdi tóleıdi, turǵyn úı járdemaqysyn rásimdeıdi, zeınetaqy tóleý ortalyǵynan, bankterden, kommýnaldyq mekemelerden qajetti anyqtamalar alyp, hat jazý, jedelhattar jiberý, qyzmet alýshyny emhana men aýrýhanaǵa, notarıýsqa erip barý nemese úıge shaqyrý qyzmetterin atqarady. Mádenı sharalarǵa ertip barýǵa bolady. Sonymen qatar áleýmettik qyzmetker múgedektigi bar balalardy jeke gıgıenaǵa jáne óz-ózine qyzmet kórsetýge, usaq jáne iri motorıkasyn damytýǵa, qorshaǵan ortany tanyp bilýge úıretedi, balany áleýmettendirýge yqpal etedi, — dep habarlady Áleýmettik járdem ortalyǵy.
Aıta keteıik 2025 jyldyń basynan bastap Áleýmettik qyzmetter portaly arqyly múgedektigi bar adamdardyń 427,1 myń tapsyrysy oryndaldy. Bul týraly Eńbek jáne halyqty áleýmettik qorǵaý mınıstrligi málim etti.