Eń boıshań sarbaz teńiz jaıaý áskerlerinde qyzmet etedi
AQTAÝ. KAZINFORM — «Batys» óńirlik qolbasshylyǵynyń teńiz jaıaý áskerleri brıgadasynda Qazaqstan Qarýly kúshteri tarıhyndaǵy eń boıy uzyn sarbaz — Álisher Nazymbek áskerı boryshyn ótep jatyr. Onyń boıy — 2 metr 9 santımetr.
Álisher Aqmola oblysy, Jarqaıyń aýdany, Dalabaı aýylynda dúnıege kelgen. Otbasyndaǵy alty balanyń biri. Onyń boıynyń uzyndyǵy naǵashy atasynan daryǵan kórinedi. Álisher bala kezinen-aq qatarlastarynan erekshelenip, mektepte de, kolledjde de kózge túsip júrgen. Endi mine, ásker qatarynda da óziniń daralyǵyn baıqatyp júr.
Áskerge deıin ol Kókshetaý joǵary kópsalaly azamattyq qorǵanys kolledjin «Órt qaýipsizdigi» mamandyǵy boıynsha támamdaǵan. Jastaıynan sportpen aınalysyp, voleıbol men kıkbokstan respýblıkalyq jarystarda kolledj namysyn qorǵaǵan. Osy saıystarda ol tek kúsh-qýat daıyndyqty ǵana emes, tabandylyǵyn da dáleldeı bildi.
Sarbazdyń aıtýynsha, áskerge barý sanaly ári, kópten kútken sheshimi bolǵan.
— Bala kúnimnen teńiz jaıaý áskerine barýdy armandadym. Munda irikteý qatal ekenin biletinmin, biraq sportpen shuǵyldanǵanymnyń arqasynda ózime senimdi boldym. Qyzmetten keıin áskerı ýchılışege túsip, ofıtser bolǵym keledi. Sondaı-aq, Qurmet qaraýyl rotasyna tússem degen de úmitim bar. Boıym uzyn bolǵan soń, alar degen oıdamyn, — deıdi Álisher.
Teńiz jaıaý áskerlerinde elimizdiń eń shydamdy, eń myqty jigitteri qyzmet etedi. Bul bólimde buǵan deıin de Denıs Balıýk (boıy 2 m 8 sm) pen Azat Muhamedjanov (2 m 4 sm) sekildi boıshań sarbazdar bolǵan. Endi jańa rekord Álisher Nazymbekke tıesili. Ol — Qazaqstan Qarýly kúshteri tarıhyndaǵy boıy eń uzyn sarbaz atanyp otyr.
Buǵan deıin, Sarbazdardyń qaýipsizdigin Qorǵanys mınıstrligi vıdeoanalıtıka júıesin engizip jatqanyn jazǵan bolatynbyz.