Eń birinshi maqsat - balalar úıindegi qaraýsyz qalǵan bala sanyn azaıtý - BǴM komıtet tóraıymy R.Sher
ASTANA. 31 qańtar. QazAqparat. /Aınur Kenebaeva/ - Búgin QR Bilim jáne ǵylym mınıstrliginde «Ár balaǵa - otbasynyń baqyty» taqyrybyndaǵy baspasóz konferentsııasy bolyp ótti.
Konferentsııa materıaldyq turǵydan qamtamasyz etilý deńgeıiniń jáne jalpy otbasy jaǵdaıynyń tómendigi saldarynan týyndaıtyn áleýmettik jetimdik syndy qoǵamnyń ózekti máselesin arqaý etti. Konferentsııaǵa QR BǴM balalar quqyǵyn qorǵaý komıtetiniń tóraıymy Raısa Sher, QR Mádenıet mınıstrliginiń vıtse-mınıstri Ǵazız Telebaev, QR Prezıdenti janyndaǵy áıelder isi jáne otbasy-demografııalyq saıasat jónindegi Ulttyq komıssııasy Hatshylyǵynyń aǵa sarapshysy Gaýhar Nurahmetova, QR BAM aqparat jáne muraǵattar komıteti tóraǵasynyń birinshi orynbasary Erbol Shaımerdenov qatysty.
Qazirgi tańda respýblıkamyzda 38 386 jetim bala men ata-ana qamqorlyǵynsyz qalǵan balalar bar. Sonyń ishinde 2067 bala qamqorlyqta, 2267 bala patronat tárbıesinde. Jetim balalar men ata-ana qamqorlyǵynsyz qalǵan balalarǵa arnalǵan uıymdardaǵy balalardyń 80 %-dan astamy áleýmettik jetimdar sanatynda.
«Eń birinshi maqsat - balalar úıindegi qaraýsyz qalǵan bala sanyn azaıtý, al ol úshin bala jetimdigine ákep soǵatyn jaǵdaılardyń aldyn alý qajet. Jospar aıasynda qolǵa alynǵan áleýmettik jetimdiktiń aldyn alý, otbasyn nyǵaıtý, otbasynyń áleýmettik jaǵdaıyn jaqsartýǵa atsalysý, áleýmettik jetimdik jóninde qoǵamdy aqparattandyrý syndy sharalar júıesi ózekti máseleni sheshýdiń alǵyshartyn qalyptastyrady»,- dedi óz sózinde R. Sher.
«2011 jylǵy 14 qańtarda jetim balalar men ata-ana qamqorlyǵynsyz qalǵan balalardy asyrap alýdy nasıhattaýǵa baǵyttalǵan úgit-nasıhat jumystarynyń jospary bekitildi», - dep málimdedi G. Nurahmetova.
«Áleýmettik jetimdik máselesin aldyn alý sharasyn nátıjeli túrde júzege asyrýda úkimettik emes uıymdardyń róli aıryqsha, sondyqtan da olardy osyndaı ıgi sharaǵa kóptep tartý qajet»,- dedi Ǵ.Telebaev.
Ǵ. Telebaev myrzanyń málimdeýinshe, 2009 jyly Mádenıet mınıstrligi men 4 úkimettik emes uıym birlesip, 10,5 mln. teńge kólemindegi jas jýrnalısterdi balalar úıi tárbıelenýshileri arasynan izdeý, balalardy qorǵaý boıynsha trenıng ótkizý, asyrap alý syndy máselelerge qatysty birqatar áleýmettik jobalardy júzege asyrǵan.
«Jetimdik» túsinigi - qazaq qoǵamyna jat bolǵan tosyn túsinik edi. Bolmysynan baýyrmal qazaq jurty ata - ana qamqorlyǵynsyz qalǵan qandasyn, kindiktesin jatyrqatpaı jaqyn tartqan halyq. Kóshpeli órkenıettiń kóne salty sanalatyn «ámeńgerlik» te sol kóregen kózqaraspen sabaqtas jatyr. Týystyq dúnetanymy tereń qazaq qoǵamynda bala ata-anasyz qalsa da, aǵaıynnan ajyramaǵan. Sondyqtan da áleýmettik jetimdiktiń aldyn alý men bala baqytyn baıandy etý sharalaryna jumyla atsalysý eń aldymen qany qazaq ár azamattyń boryshty enshisi bolmaq.
