Eń bastysy - mektep avtobýstarymen balalardy qaýipsiz tasymaldaý - Arman Sarybasov
ALMATY. Tamyzdyń 28-i. QazAqparat /Erbol Turymbetov/ - Jańa oqý jyly qarsańynda Almaty qalalyq Jol polıtsııasy basqarmasy balalardyń jol qaýipsizdigi sharalaryn kúsheıtýde, dep habarlaıdy QazAqparat.
«1-shi qyrkúıekten bastap JPB ınspektorlary bilim berý mekemeleri janynda balalardyń joldaǵy qaýipsizdigin qamtamasyz etý úshin kezekshilik jasaıtyn bolady. BAQ-nan júrgizýshilerge kóliktiń jaqyn qashyqtyqty shamyn jaǵyp júrý, qaýipsizdik beldeýlerin taǵý jáne qozǵalys kezindegi balalarǵa arnalǵan tutqalardyń bolýy eskertiletin bolady. Sondaı-aq, jaıaý júrginshiler jolaǵy ornalasqan jerlerde erejeni saqtaı júrý men qala kóshelerinde jyldamdyqty qalyptan asyrmaý arnaıy eskertiledi», dedi Almaty qalalyq JPB-nyń bastyǵy Arman Sarybasov.
Jol polıtsııasy ókilderiniń aıtýynsha, joǵaryda aıtylǵan sharalar oryndalyp jatsa, bul úlken paıda. Biraq, ata-analar da qur qol otyrmaýy kerek. Múmkindiginshe balalarynyń qaýipsizdigi úshin ýaqyt taýyp, oqý bastalǵanǵa deıin mektepke barar jolmen ózderi balalaryn ertip júrip ótkenderi abzal. Soǵan baılanysty, balalaryna qaı jerlermen júrgen qaýipsiz ekenin, qandaı jaǵdaıda joldy qıyp ótý kerektigin jáne qoǵamdyq kóliktermen júrý joldaryn jaqsylap túsindirgenderi durys.
«Avtokólik kásiporyndary júrgizýshilerimen garajdy kooperatıvterde jáne avtobýs lınııalarynda jolda balalarǵa kóńil bólý men qaýipsizdik beldeýlerin taǵý jóninde arnaıy nusqaýlar júrgiziledi. Qyrkúıek bastalysymen mektep muǵalimderimen birge JPB jáne kámeletke tolmaǵan balalar ınspektorlary jol qozǵalysy týraly oqýshylarǵa túsiniktemeler beriledi. Sonymen qatar, Almatyda birinshiden, mektep basshylary men muǵalimderge balalardyń qaýipsiz jol qozǵalysy týraly nusqaýlar jasaldy. Eń bastysy - mektep avtobýstarymen balalardy tasymaldaý», deıdi polkovnık Sarybasov.
