Eń basty másele - saralanǵan tarıfterden túsetin qomaqty qarajattyń durys jumsalýyn qadaǵalaý - Jánibek Káribjanov
ASTANA. Qyrkúıektiń 27-si. QazAqparat - Búgin QR Parlamenti Májilisinde ótken «Tarıftik saıasattaǵy energııany únemdeý» degen taqyryptaǵy Úkimet saǵatyn Májilis Tóraǵasynyń orynbasary Jánibek Káribjanov qorytyndylady.
J.Káribjanov ekonomıkanyń monopolııalyq sektoryn memlekettik retteý, energııany únemdeý, energııa resýrstaryn, elektr energııasyn jáne sýdy únemdeý máselelerin sheshý - agenttik jumysynyń basty strategııalyq baǵyty ekenin,al osy baǵyttaǵy jasalyp jatqan is-sharalardyń basty maqsaty - turǵyndardyń-tutynýshylardyń múddelerin qamtamasyz etetin tıimdi tarıfti qalyptastyrý saıasatyn iske asyrý ekenin aıtyp ótti.
Osy jolda sýbektilerdiń qyzmetterin tıimdi retteýdiń jańa ádisteri paıda bolýda, osy salalardyń ınvestıtsııalyq tartymdylyǵyn arttyrý júmystary jalǵastyrylýda. Jasalyp jatqan is-sharalardan qol jetken jetistikter de jetkilikti.
«Bul salada sheshilmegen máseleler de joq emes. Turǵyndarǵa kórsetiletin qyzmetter sapasyn arttyrý jáne osy saladaǵy kórsetiletin tarıfterdiń turaqtylyǵyn qamtamasyz etý, ıaǵnı, turaqtylyqty bir jyl emes, eki nemese úsh jylǵa deıin jasaý jáne de respýblıka óńirleriniń múddelerin eskerý qajet. Mundaı jaǵdaı, ásirese, kún kórisi tómen otbasylar úshin óte mańyzdy másele. Tabıǵı monopolııalar sýbektileriniń ınvestıtsııalyq mindettemelerin oryndaýyna baqylaýdy kúsheıtý, normatıvtik tehnıkalyq ysyraptardy azaıtý, tómendetý jumystaryn qatal júrgizý. Sebebi bul is-sharalar - tarıftiń shamasyna áser etetin negizgi faktorlardiń biri. Jáne eń basty másele - saralanǵan tarıfterden túsetin qomaqty qarajattyń durys jumsalýyn qadaǵalaý»,- dedi J.Káribjanov.
Májilis Tóraǵasynyń orynbasary atalǵan saladaǵy kórsetilgen zań normalarynyń jáne tutynýshylardyń quqyqtarynyń buzylýyn boldyrmaýdy baqylaý jáne jaýapkershilikti qajet etse, taǵy da kúsheıtý kerektigin, sebebi tabıǵı monopolııa jáne retteletin naryq sýbektileriniń, energııa óndirýshi uıymdardyń tekserý nátıjesin qarasaq, ol tek qana aıyppul sanktsııalarymen shektelgen sııaqty, osy másele de qaıta qaraýdy qajet etedi dep esepteıtinin jetkizdi.
«Búgingi qaralǵan másele jalǵyz agenttiktiń jumysy emes. Atqarylyp jatqan ister nátıjeli bolýy úshin basqa mınıstrliktermen, jergilikti atqarýshy organdarmen birlese jumys isteý kerek»,- deı kelip, Úkimet músheleri de depýtattar kótergen máselelerge kóńil bólýi qajet ekenin, óz kezeginde depýtattar da zańnamalyq turǵydaǵy usynystardy qaraýǵa árqashan daıyn ekendigin málim etti.
Aıta ketý kerek, Úkimet saǵatynda kún tártibindegi másele boıynsha QR Tabıǵı monopolııalardy retteý agenttiginiń tóraǵasy Nurlan Aldabergenov baıandama jasady. Sonymen qatar baıandamashy osy másele tóńireginde depýtattardyń suraqtaryna jaýap berdi.
Úkimet saǵatynda atalǵan taqyryp negizinde V.Nehoroshev, E.Kappel, V.Doskalov, Sh.Ótemisov, I.Chırkalın, V.Kotovıch, V.Kııanskıı, J.Dúısebaev, Q.Ydyrysov, M.Qusaıynov, B.Baımaǵambetova, N.Sabılıanov jáne basqa depýtattar suraqtar qoıyp, óz pikirleri men usynystaryn jetkizdi.
