Eń arzan janar-jaǵarmaı qaı óńirde satylady

NUR-SULTAN. QazAqparat - 2019 jyldyń alǵashqy 5 aıynda 36,5 mln tonna munaı men kondensat óndirildi. Bul 5 aıǵa qoıylǵan jospardan 101% joǵary, dep habarlaıdy QazAqparat.

QR Energetıka mınıstri Qanat Bozymbaevtyń aıtýynsha, úsh iri joba boıynsha munaı óndirý kólemi 21,7 mln tonnany qurady. Onyń ishinde Qashaǵanda - 4,24 mln tonna, Teńizde - 12,48 mln tonna jáne Qarashyǵanaqta - 4,97 mln tonna munaı óndirilgen.

«Jalpy alǵanda, bıylǵy munaı óndirý jospary oryndalady. Munaı eksportynyń kólemi 29,1 mln tonnaǵa jetti. Bul - 2018 jyldyń sáıkes kezeńimen salystyrǵanda 95,4% artyq. Al, munaı óńdeý kólemi shamamen 6,7 mln tonnany qurady. 2018 jyldyń sáıkes kezeńimen salystyrǵanda 5,1% joǵary. Óndirilgen munaı ónimderiniń kólemi 5,07 mln tonnany quraıdy. Bul 2018 jyldyń sáıkes kezeńimen salystyrǵanda 14% joǵary», - dedi Qanat Bozymbaev QR Úkimeti otyrysynda.

Jalpy, munaı ónimderi naryǵyndaǵy jaǵdaı turaqty. Janar-jaǵarmaı tapshylyǵy joq.

«5 maýsymdaǵy jaǵdaı boıynsha, Aı-92 markaly benzınniń ortasha baǵasy: bir lıtrine - 148,7 teńge, al maýsymaralyq dızel otynynyń baǵasy - 192 teńge. Sonymen qatar, Aı-92 markaly benzın baǵasynyń tómendegeni baıqalady. Máselen, Aı-92 markaly benzınge eń tómengi baǵa Batys Qazaqstan oblysynda - 139 teńge bolsa, dızel otynǵa eń tómengi baǵa Túrkistan oblysynda - 175 teńge», - dedi mınıstr.