Eń alǵashqy daýys berýshi – Japonııada oqıtyn stýdent Jibek Aıdyn
ASTANA. KAZINFORM – Qazaqstan Respýblıkasynyń azamattary referendýmda ózderiniń konstıtýtsııalyq quqyqtaryn alǵashqylardyń biri bolyp Japonııada júzege asyrdy. Bul týraly elimizdiń Syrtqy ister mınıstrligi habarlady.
Alǵashqylardyń biri bolyp Tokıo qalasynda ótken referendýmda daýys bergen Qazaqstan azamaty «Nıhon» ýnıverstıtetiniń 3-kýrs stýdenti Jibek Aıdyn boldy.
– Qarastyrylyp otyrǵan másele elimizdiń aldaǵy damý baǵyty úshin mańyzdy. Referendým ótkizý ashyqtyqty qamtamasyz etip, qoǵam pikirin jan-jaqty eskerýge múmkindik beredi. Memleket árbir azamattyń óz tańdaýyn jasaýyna qajetti jaǵdaı jasap otyr, al biz úshin belsendi azamattyq ustanym tanytý – mańyzdy mindet, – dep atap ótti J.Aıdyn.
Ol sondaı-aq shetelde turatyn otandastarymyz Qazaqstan Respýblıkasynyń dıplomatııalyq ókildikteriniń qoldaýymen referendýmǵa qatysý múmkindigine ıe bolǵanyn atap ótti.
– Bul – elimizdiń bolashaǵyna qatysty jaýapty sheshim qabyldaýǵa berilgen ortaq múmkindik. Qabyldanatyn sheshim Qazaqstannyń ornyqty ári serpindi damýyna oń yqpal etedi dep senemin, – dep túıindedi daýys berýshi.
Sondaı-aq Seýl qalasyndaǵy ýchaskede alǵashqylardyń biri bolyp Azııa orman yntymaqtastyǵy uıymynyń (AFoCO) qyzmetkeri Qazaqstan azamaty Ernar Sarsenbaev daýys berdi.
Ol shetelde júrgen azamattar úshin osyndaı mańyzdy saıası protseske qatysý múmkindigi jasalǵanyn joǵary baǵalap, referendýmǵa qatysý árbir azamattyń azamattyq jaýapkershiliginiń kórinisi ekenin atap ótti.
– Mundaı mańyzdy ulttyq máseleler boıynsha óz pikirińdi bildirý – ár azamattyń paryzy. Referendým elimizdiń damýy men bolashaǵyna qatysty mańyzdy sheshim qabyldaýǵa múmkindik beredi, – dedi ol.
Aıta keteıik, Ońtústik Koreıa men Japonııadaǵy qazaqstandyqtar referendýmda daýys berýdi bastaǵanyn habarladyq.