Eń aldymen Jańaózendegi áleýmettik-ekonomıkalyq, gýmanıtarlyq problemalar sheshimin tabatyn bolady - Úkimet basshysy
ASTANA. 20 jeltoqsan. QazAqparat /Rýslan Ǵabbasov/ - Eń aldymen, Jańaózendegi áleýmettik-ekonomıkalyq, gýmanıtarlyq problemalar sheshimin tabatyn bolady.
Bul týraly búgin Úkimet otyrysynda Premer-Mınıstr Kárim Másimov málim etti. «Qazir Úkimettiń eń birinshi mindeti - tártipsizdiktiń saldarynan oryn alǵan áleýmettik-ekonomıkalyq, gýmanıtarlyq problemalardy tez arada sheshý úshin qajetti jaǵdaılardy jasaý», dedi Premer-Mınıstr. Osy oraıda ol qalanyń kúndelikti ómirin qalpyna keltirý, búlingen jáne qıraǵan nysandardy tez arada jóndep, iske qosý qajet ekenin tapsyrdy. «Biz kópshilik tutynatyn taýarlar men azyq-túliktiń tapshylyǵyn boldyrmaýymyz kerek. Turǵyn úı - kommýnaldyq sharýashylyq júıesin, jaryq, jylý, ystyq sý berý, telefon baılanysy qyzmetin qalpyna keltirý shart», dedi Úkimet basshysy.
