Eń aldymen, arnaıy komıssııa quryp, latyn qarpindegi qazaq álipbıin kompıýterge beıimdeý kerek - N. Nazarbaev
ASTANA. 29 jeltoqsan. QazAqparat - Memleket basshysy Nursultan Nazarbaev qazaqstandyq BAQ-qa bergen suhbatynda latyn álipbıine kóshý úshin eń aldymen, arnaıy komıssııa quryp, latyn qarpindegi qazaq álipbıin kompıýterge beıimdeý kerektigin aıtty.
«Eń aldymen, arnaıy komıssııa quryp, latyn qarpindegi qazaq álipbıin kompıýterge beıimdeý kerek. Túrik aǵaıyndar bir jaǵynan núkteler, útirler qoıyp jatyr. Bizde ondaı kúrdelilik bolmaýǵa tıis. Tipti eki-úsh áripti qosyp, bir dybys etip aıtatyn elder de bar. Nemis tilinde «sh» dybysyn úsh árip beredi, frantsýz tilinde tórt árippen jazylatyn dybystar bar. Bir sóz neshe áripten turatynyn túsinbeıtin kezder de bolady», - dedi Memleket basshysy.
Prezıdenttiń atap ótýinshe, latyn qarpi bizge dúnıe júziniń halqymen, álemniń ǵylym-bilimimen qarym-qatynas úshin kerek. «Aldyńǵy býyn aǵalar, jazýshylar, ǵalymdar «bizdiń jazǵanymyzdyń barlyǵy syrtta qalyp qalady» dep oılamaýy kerek. Onyń barlyǵy aýdarylatyn bolady. Árıne, oǵan ýaqyt kerek. Tóńiregimizdegi Ózbekstan da, Túrkmenstan da, Ázerbaıjan da osylaı istep jatyr», - dep atap ótti Elbasy.
