Em izdegen sheteldikter Qazaqstandy jıi tańdaı bastady
ASTANA. KAZINFORM — Qazaqstanda emdelý quny Eýropa, Soltústik Amerıka, Ońtústik Koreıa jáne Parsy shyǵanaǵy elderine qaraǵanda aıtarlyqtaı tómen. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Elimizde medıtsınalyq týrızmdi damytý máselesi óte ózekti mánge ıe bolyp otyr. Bul sala otandyq densaýlyq saqtaý júıesiniń básekege qabilettiligin arttyrýǵa, halyqaralyq yntymaqtastyqty keńeıtýge jáne elimizdiń álemdik medıtsınalyq qyzmetter naryǵyndaǵy pozıtsııasyn nyǵaıtýǵa yqpal etetin bolashaǵy zor strategııalyq baǵyttardyń birine aınaldy, — dedi Úkimet basshysy jaýabynda.
Sonymen qatar ol Memleket basshysynyń tapsyrmasyn oryndaý maqsatynda keshendi sharalar qabyldanyp jatqanyn aıtady.
— Búgingi kúni sheteldikter arasynda joǵary suranysqa ıe baǵyttardyń tizbesi (kardıohırýrgııa, onkologııa, transplantologııa, reprodýktıvti medıtsına, ortopedııa, oftalmologııa, stomatologııa jáne medıtsınalyq ońaltý) aıqyndaldy. Bul rette birqatar baǵyt boıynsha mamandardyń biliktilik deńgeıi jáne klınıkalardyń jaraqtandyrylýy jetekshi sheteldik ortalyqtardan esh kem emes. Al Qazaqstanda emdelý quny Eýropa, Soltústik Amerıka, Ońtústik Koreıa jáne Parsy shyǵanaǵy elderine qaraǵanda aıtarlyqtaı tómen, — dedi Premer-mınıstr.
Onyń aıtýynsha, qoldanystaǵy zamanaýı joǵary tehnologııalyq kómek kórsetý júıesiniń bazasynda elimizde Ortalyq Azııanyń biryńǵaı medıtsınalyq haby qalyptastyrylyp jatyr.
— Atalǵan hab Qazaqstandy kórshiles memleketter úshin ozyq medıtsınalyq qyzmetter men ınnovatsııalardyń óńirlik ortalyǵy retinde tanytýǵa múmkindik beredi. Qazaqstan medıtsınalyq týrızm salasynda aıtarlyqtaı áleýetke ıe ári Ortalyq Azııa elderiniń arasynda tek bizdiń elimiz birqatar zamanaýı jáne biregeı medıtsınalyq qyzmetterdi (protondyq terapııa, gamma-pyshaq, kúrdeli kardıohırýrgııalyq operatsııalar jáne t. b.) usynatynyn atap ótken jón, — dedi ol.
Premer-mınıstr jaýabyna qosymsha berilgen anyqtamaǵa sáıkes, búginde elimizdiń 10 medıtsınalyq uıymy JCI halyqaralyq akkredıtatsııasyna ıe. Onyń 7-eýi Astana qalasynda, 3-eýi Almaty qalasynda ornalasqan. 2025 jyly elimizde 4 488 sheteldik patsıentke medıtsınalyq qyzmet kórsetildi. Eń kóbi Almaty (2 685 adam), Astana (1 396 adam) jáne Shymkent (300 adam) qalalarynda tirkelgen.
Aıta keteıik, elimizde dárigerler men stýdentterdiń qatysýymen medıtsınalyq volonterlik damyp keledi.
