Emxanany elektrondy júıege kóshirý: Jumyssyz qalǵan qyzmetkerler qaıda barady
«Ótken jyly emxanalardy elektrondy formatqa aýystyrý aıasynda biz qyzmetkerlerdiń 15 protsentin ońtaılandyrdyq. Bul qysqartý emes. Máselen, tirkeý bóliminde, sosyn statıstıka boıynsha jumys isteıtin qyzmetkerler bar. Tsıfrlandyrý kezinde osy sanattaǵy qyzmetkerlerdi azaıtýǵa týra keldi. Buryn tirkeý bóliminde bes adam jumys istese, qazir úsheýi ǵana qaldy. Sonda respýblıka boıynsha shamamen 2 000 adamnyń qyzmettik mindeti ózgerdi. Biz olardy qaıta oqytyp, medbıkeler qataryna qostyq. Barlyǵy ózderi istegen emxanalarda qaldy», - dedi O.Ábishev Astanada ótken baspasóz máslıxatynda.
QR Densaýlyq saqtaý mınıstrligi taratqan málimetke sáıkes, medıtsınalyq mekemelerdiń jumysyn elektrondy formatqa aýystyrýdyń nátıjesinde xalyqtyń emxanaǵa barýy eki esege azaıdy. Kezek kútý ýaqyty da eki esege (30 mınýttan 15 mınýtqa) qysqardy.
Dárigerler men patsıentterdiń biraz ýaqyty únemdelip otyr. Mınıstrlik bolsa, jylyna 3 200 tonna qaǵazdyń aqshasyn únemdeı alady. Búginde aýdan ortalyqtaryna deıin barlyq emxanalar tolyǵymen elektrondy formatqa kóshti. Endigi kezekte, aýyl emxanalaryn elektrondy júıege aýystyrý josparlanǵan.
Aıta keteıik, búgingi baspasóz máslıxatynda vıtse-mınıstr emxanalarda elektrondy júıeniń isten shyǵýyna sebep bolatyn negizgi máseleni de atady.
«Iá, emxanalarda «kompıýter zavısat etip qaldy», «baza istemeı qaldy» degen máseleler bar. Jańa kompıýter alsaq ta, ol problema sheshilmeıdi. Sebebi medıtsınalyq mekemede bir nemese eki ınternet arna bolýy múmkin. Bir arnanyń ishinde 8 Megabıt bolsa, onymen 100-200 qyzmetker jumys istep otyrady. Sonda keıbir adamdar YouTube-ti ashyp, kıno kóredi. Sonyń saldarynan trafık biteledi, nátıjesinde basqa qyzmetkerler jumys isteı almaı qalady», - deıdi O.Ábishev.