Emtıhansyz júrgizýshi kýáligin berý úshin ınspektor 102 myń teńge para alǵan
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qoǵammen baılanys departamentiniń dırektory Arman Berdalın málimdedi.
«Sybaılas jemqorlyqqa qarsy is-qımyl ulttyq bıýrosynyń Jambyl oblysyndaǵy departamenti teorııalyq jáne praktıkalyq emtıhandardy qabyldamaı, «V» jáne «E» sanattaryndaǵy júrgizýshi kýálikterin alýǵa járdemdeskeni úshin eki azamattan 102 myń teńge para alǵan oblystyń Shý aýdandyq polıtsııa bólimi tirkeý-emtıhan tobynyń memlekettik avtoınspektoryna (polıtsııa maıory) jáne onyń úsh sybaılasyna qatysty sotqa deıingi tergeýdi bastady. Kinásin tolyq moıyndaýyna baılanysty kúdikti tulǵalardy protsestik ustaý qoldanylǵan joq. Tergeý jalǵasyp jatyr», - dedi Arman Berdalın elordada ótken brıfıngte.
Onyń aıtýynsha, jyl basynan beri memlekettik avtoınspektorlardyń teorııalyq jáne praktıkalyq emtıhandardy qabyldamaı, zańsyz emtıhan paraqtaryn toltyrýy jáne júrgizýshi kýálikterin berýi jóninde 37 fakti (Aqtóbe - 27, Mańǵystaý - 8, SQO - 1) anyqtaldy.
«Qazirgi ýaqytta Ulttyq bıýro uqsas shemada jumys isteıtin polıtsııa qyzmetkerleri men sybaılas-kómekshilerdi jappaı anyqtaý jumystaryn júrgizip jatyr», - dedi A. Berdalın.