Emtıhannan keıin sýıtsıd jasaǵan 15 jastaǵy qyzdyń ólimi boıynsha tergeý bastaldy
TÚRKІSTAN. QazAqparat - Túrkistan oblysy, Ordabasy aýdanynda mektepte emtıhan tapsyryp kelgen soń, óz ózine qol jumsaǵan 15 jastaǵy qyzdyń ólimi boıynsha tergeý bastaldy, dep habarlaıdy QazAqparat tilshisi.
Alty kún buryn 9-shy synypty bitirgen Elvıra Myqtybek kezekti synaq tapsyryp kelgennen soń, óz úıiniń qorasynda asylyp qalǵan bolatyn. Mektepte muǵalim bolyp jumys isteıtin tórt balanyń anasy qyzynyń synyp jetekshisi bolǵan. Emtıhan tapsyryp shyqqan ol úıge kóńilsiz kúıde kelgen.
Elvıranyń óler aldynsa uıaly telefonyna hat jazyp qaldyryp ketkenin aıtady. Biraq ony anasyna jiberip úlgermepti.
«Men jylap, eńirep júrgen kezde maǵan qyzymnyń uıaly telefonyn ákelip kórsetti. Onda «mama, keshirińizshi. Sizdiń úmitińizdi aqtaı almadym. Sizdiń atyńyzǵa jaqsy at keltire almadym» degen habarlamasy tur eken. Ony jibermegen. Men eshýaqytta qyzyma sen «bes» degen baǵa al nemese «bes» almasań bolmaıdy, ómirdiń bári beske baılanysty qadalyp qalǵan dep qysym kórsetken emespin. Toǵyzynshy synypta barlyq páni «bes» bolǵandyqtan men ony úzdikter qataryna usyndym. Men qyzyma únemi «baǵada turǵan eshteńe joq, bir mánisi bolar» dep aıtyp otyratynmyn. Ózim kómektesem, birge bolamyz. birge mamandyq tańdasyp áńgimelesip júrgenbiz»,- deıdi anasy.
Alaıda bul oqıǵa jaıynda qazir sol kúni synaqqa birge kirgen synyptastary da, algebradan synaq alǵan muǵalimi de jaq ashpady. Tek mektep dırektory marqum oqýshysyna sol kúni qysym kórsetpedim dep aqtaldy.
«Men ózim memlekettik emtıhanda tóraǵa retinde maǵan oryn berdi, men sol orynda otyrdym. Eshqandaı balanyń tóbesinde qarap, baryp qasyna eshteńe istegen joqpyn. Aýyr jaǵdaı»,- deıdi mektep dırektory Aısara Staeva.
Óz kezeginde mektep psıhology da oqýshysynyń ne sebepti mundaı qadamǵa barǵanyn túsine almaı dal.
«Ol ondaıǵa baratyn qyz emes edi. Minezi ashyq, oqýshylarmen synypta jalpy qarym-qatynasy jaqsy bolatyn»,- degen pikirin bildirdi psıholog Aısara Qulmaǵanbet.
Qazir osy oqıǵaǵa oraı oblystyq adamı áleýetti damytý basqarmasy men bilim sapasyn baqylaý departamenti tarapynan zerdeleý komıssııasy qurylyp, jumys istep jatyr.Sol kúni mektepte bolǵan muǵalimder men oqýshylardan jaýap alynýda. Mán-jaıdy tolyq anyqtamaq.
«Marqum bolǵan Elvıra Myqtybektiń emtıhan kezinde shyǵarǵan esepteriniń bárin biz qarap jatyrmyz qazir. Zerdeleý júrip jatyr. Qorytyndysyn, nátıjesin bitkennen keıin aıtamyz. Bizben birge qazir tergeý oryndary da qazir jumys júrgizip jatyr. Sondaı-aq, mekteptiń jaǵdaıy búginge deıingi, moraldyq psıhologııalyq jaǵdaıy, qaıǵyly oqıǵanyń neden týyndaǵanyn, sonyń bárin qortyndysymen aıtamyz»,- deıdi Túrkistan oblystyq Adamı áleýetti damytý basqarmasynyń bólim basshysy Álibek Kenjebaev.
Qazir osy oqıǵa boıynsha óńirdiń Polıtsııa departamenti «Ózin –ózi óltirýge deıin jetkizý» babymen qylmystyq is qozǵap, tergeý amaldaryn júrgizýde. Tergeýshiler oqıǵa bolǵan kúnnen beri aýyl mektebinde ata-analar, oqýshylar men mektep ujymynan jappaı jaýap alýda. Óńirdiń bas polıtseıi Qaırat Dálbekov osy isti óz baqylaýyna alǵanyn habarlady.
«Ata-ana úshin balasynyń qazasy qanshalyqty qabyrǵany qaıystyratynyn jaqsy túsinemin jáne sizderdiń qaıǵylaryńyzǵa ortaqpyn. Sondyqtan aıtaıyn degenim, bul is meniń jeke baqylaýymda tur. Qyzmetkerlerge tııanaqty tapsyrmalar berildi. ıAǵnı, atalǵan jaıt boıynsha Túrkistan oblysy Polıtsııa departamentiniń bilikti tergeýshilerimen QR QK-niń 105-baby «Ózin-ózi óltirýge deıin jetkizý» boıynsha sotqa deıingi tergeý jumystary júrgizilýde jáne qajetti degen barlyq jan-jaqty sharalar júzege asyrylýda. Onyń ishinde mektep ujymynan, muǵalimder men oqýshylardan jaýaptar alynýda. Tıisti saraptamalar da taǵaıyndaldy. Іstiń zań aıasynda júrgizilýi qadaǵalaýda» - delingen Qaırat Dálbekovtyń habarlamasynda.
Aıta keteıik, marqum bolǵan jasóspirimniń denesi ótken aptada jer qoınyna tapsyryldy.
