«Emshige» emdetýdiń sońy eki sábıdiń ólimine soqtyrdy - BQO
ORAL. QazAqparat - Oral qalasynda Nına esimdi «emshi» eki birdeı sábıdiń ólimine sebepker bolǵan.
Oblystyq densaýlyq saqtaý basqarmasynyń bas mamany, pedıatr Aınash Ǵubaıdýllınanyń aıtýynsha, birinshi oqıǵa ótken jyly kúzde oryn aldy. Atalǵan emshi Bórli aýdanynan alyp kelgen jeti aılyq balany qyshaǵa orap tastap, ata-anasyna bir táýlik boıy ashpańyz degen. Segiz saǵattan keıin qaraǵanda, sábı kúıip qalǵan. Ekinshi oqıǵa bıylǵy sáýirde bolǵan. Almatydan Oralǵa kelip, jas bosanǵan ana qyryq kúndik nárestesin emshige qaratqanda, «kindiginde jaryq bar» dep túgel orap tastaǵan. Sábı aqyry sepsısten kóz jumdy. Keıin hırýrgter qaraǵanda, balada kindik jaryǵy joq bolyp shyqty.
Taıaýda osy emshige qaralǵan Terekti aýdany Podstepnyı aýylynan qyryq kúndik egiz bala da osyndaı jaǵdaıǵa ushyraı jazdady.
Ókinishke qaraı, mundaı ata-analar balanyń quqyǵyn buzyp, dárigerlerge qaralmaı, emshige barýdy jón kóredi. Bul baǵytta ishki ister, prokýratýra organdarymen birlesip, aldyn alý jumystary júrgizilýde.
