Emomalı Rahmon óńirlik kómirtek naryǵyn qurýdy usyndy

ASTANA. KAZINFORM – Elordada ótip jatqan Óńirlik ekologııalyq forýmda Tájikstan Prezıdenti Emomalı Rahmon Ortalyq Azııa elderine óńirlik kómirtek naryǵyn kezeń-kezeńmen qurýdy usyndy.

- Tájikstan úshin sý energetıkany jáne basqa da taza energııa kózderin damytý strategııalyq basymdyq sanalady. Qazirgi jaǵdaıda ekologııalyq ınvestıtsııalardy jumyldyrý jáne jasyl ósýdi qoldaıtyn naryqtyq tetikterdi engizý erekshe mańyzǵa ıe. Osyǵan baılanysty Tájikstan Úkimeti jasyl oblıgatsııalar shyǵarýdy júzege asyrady. Bul eldiń jahandyq turaqty klımattyq qarjylandyrý júıesine kirigý jolyndaǵy mańyzdy qadamy. Shyǵaryndylardy qysqartý jónindegi kúsh-jigerdi qoldaý jáne jańa ınvestıtsııalar tartý maqsatynda óńirlik kómirtek naryǵyn kezeń-kezeńimen qurý múmkindigin qarastyrý oryndy dep sanaımyz, - dedi Tájikstan Prezıdenti Emomalı Rahmon.

Sonymen qatar ol bıologııalyq resýrstardy qorǵaý jáne tıimdi paıdalaný qorshaǵan orta máselelerin sheshýdegi eń mańyzdy qadamdardyń biri sanalatynyn basa aıtty.

- Osyǵan oraı, Tájikstanda 2040 jylǵa deıingi kezeńge arnalǵan eldi kógaldandyrý jónindegi naqty baǵdarlama qabyldandy. Ol orman ekojúıelerin qalpyna keltirý maqsatynda 1 mıllıardtan astam aǵash otyrǵyzýdy kózdeıdi. Táýelsizdik jyldary ishinde respýblıkadaǵy erekshe qorǵalatyn tabıǵı aýmaqtardyń jalpy kólemi 2,5 paıyzdan 22 paıyzǵa deıin artqanyn atap ótken jón, - dedi Tájikstan Prezıdenti.

Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótýde.