Emomalı Rahmon Naýryz merekesine oraı 897 sottalýshyǵa raqymshylyq jasady

ASTANA. KAZINFORM - 20 naýryzda Tájikstan prezıdenti Emomalı Rahmon «Bas bostandyǵynan aıyrýǵa sottalǵandarǵa raqymshylyq jasaý týraly» jarlyq shyǵardy, oǵan sáıkes 897 sottalýshy jazasyn odan ári óteýden bosatylady, dep habarlaıdy TR prezıdentiniń baspasóz qyzmeti.

Jarlyq Halyqaralyq Naýryz merekesine oraı jáne «Tájikstan Respýblıkasy Konstıtýtsııasynyń 69-babyna sáıkes» qabyldandy.

Qujatqa jasalǵan qysqasha túsiniktemede raqymshylyq jasaý aktisi «adamgershilik, otbasylarǵa, balalar men jasóspirimderge qamqorlyq jasaý qaǵıdattaryna negizdelgen» delingen.

«Halyqaralyq Naýryz merekesi qarsańynda 897 sottalýshy raqymshylyqqa ilinip, jazasyn odan ári óteýden bosatylady. Bul jarlyq jeńil, ortasha jáne aýyr qylmystar jasaǵany úshin bas bostandyǵynan aıyrylǵan jáne túzeý mekemelerinde jazasyn ótep jatqan sottalǵandarǵa qatysty», - dep túsinikteme berdi TR prezıdentiniń baspasóz qyzmeti qujatqa qatysty.

Jarlyqqa raqymshylyq jasalǵan adamdardyń tizimi qosa beriledi, biraq ol áli jarııalanǵan joq. Sondaı-aq naqty qandaı qylmysy úshin sottalǵandar jazadan bosatylatyny belgisiz.

Eske sala keteıik, Ózbekstan, Qyrǵyzstan jáne Tájikstan prezıdentteri Naýryz merekesin birge toılaıdy.