Emomalı Rahmon Qazaqstannyń eń joǵary nagradasy – «Altyn Qyran» ordenimen marapattaldy

ASTANA. QazAqparat – Memleket basshysy Qasym-Jomart Toqaev Qazaqstan Respýblıkasy men Tájikstan Respýblıkasy arasyndaǵy dostyq pen yntymaqtastyqty nyǵaıtýǵa qosqan aıryqsha úlesi úshin Tájikstan Prezıdenti Emomalı Rahmondy elimizdiń eń joǵary memlekettik nagradasy – «Altyn Qyran» ordenimen marapattady, dep habarlaıdy QazAqparat Aqordaǵa silteme jasap.

Qasym-Jomart Toqaev Qazaqstan men Tájikstannyń baýyrlas halyqtary arasyndaǵy dostyqty, ózara túsinistik pen yntymaqtastyqty nyǵaıtýǵa Emomalı Rahmonnyń qosqan orasan zor úlesin atap ótti.

«Biz árdaıym barlyq deńgeıdegi tyǵyz jáne senimdi saıası dıalogty qoldaımyz. Elderimiz arasynda berik sharttyq-quqyqtyq baza qalyptasty. Saýda-ekonomıkalyq yntymaqtastyq qarqyndy damyp, mádenı-gýmanıtarlyq baılanystardyń aıasy udaıy keńeıip keledi. Biz Ortalyq Azııadaǵy jan-jaqty yntymaqtastyqty nyǵaıtýǵa úles qosa otyryp, asa mańyzdy halyqaralyq qurylymdar aıasynda ózara tabysty áreket etip kelemiz. Búginde memleketaralyq baılanystarymyzdyń odaqtastyq qatynas deńgeıine kóterilgeni qýantady. Bul Sizdiń eki el arasynda úlgili qarym-qatynas qalyptastyrýǵa erekshe atsalysqanyńyzdyń nátıjesinde múmkin boldy», – dedi Memleket basshysy.

Óz kezeginde E.Rahmon eldiń joǵary memlekettik nagradasymen marapattalǵanyna rızashylyǵyn bildirdi.

«Qurmetti Qasym-Jomart Kemeluly, meni «Altyn Qyran» ordenimen marapattaý jóninde sheshim qabyldaǵanyńyz úshin Sizge alǵys aıtamyn. Bul nagrada, eń aldymen, búkil Tájikstan halqynyń tájik-qazaq qatynastaryn, dostyǵy men yntymaqtastyǵyn damytýǵa jáne nyǵaıtýǵa qosqan úlesi úshin berilgen joǵary baǵa dep bilemin. Baýyrlas halyqtarymyzdyń ıgiligi úshin Tájikstan men Qazaqstan arasyndaǵy strategııalyq seriktestikti jan-jaqty nyǵaıtýǵa jáne keńeıtýge aldaǵy ýaqytta da bar kúsh-jigerimizdi salatynymyzǵa senimdimin», - dedi Tájikstan basshysy.

Aıta keteıik, keshe Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy aldy.

Al 3 mamyrda Qazaqstan-Tájikstan bıznes-forýmynda birqatar mańyzdy qujatqa qol qoıyldy.

Búgin qos eldiń basshylary shaǵyn quramdaǵy kelissóz ótkizdi. Óz kezeginde E.Rahmon Astanaǵa memlekettik saparmen kelýge shaqyrǵany jáne qazaq halqynyń dástúrli qonaqjaılyǵy úshin Qasym-Jomart Toqaevqa alǵys aıtty.