Emotsııa júrekke qalaı áser etedi? - The New York Times
ASTANA. QazAqparat - The New York Times basylymynda «Emotsııa júrekke qalaı áser etedi?» atty maqala jarııalandy. Tanymal kardıolog, birneshe kitaptyń avtory Sandıp Djaýhardyń bul maqalasynda dárigerlerge júrek aýrýlaryna kúızelis pen basqa da emotsııalardyń áser etýi múmkindigin eskerý kerektigi aıtylǵan. Sonymen qatar avtor osy saladaǵy zertteýlerge de toqtalady.
«Júz jyl buryn Karl Pırson beıitterdi aralap júrip, áıelder men olardyń kúıeýleriniń qaza tapqan ýaqyttarynyń bir-birinen alshaq emestigin baıqaǵan. Keıinirek túrli zertteýler nátıjesinde kúızelis pen úmittiń úzilýi, toryǵý men rýhtyń túsýi de adam densaýlyǵyna áser etetini, onyń ishinde júrekke salmaq túsetini anyqtaldy», - dep jazǵan avtor takotsýbo kardıomıopatııasy atty aýrýǵa toqtalady.
Onyń aıtýynsha, bul aýrý júrek talmasyna uqsas belgilerge ıe jáne jaqyn adamnyń qaza tabýy, qarjylyq qıyndyq nemese basqa da emotsııalyq jaǵdaı kesirinen paıda bolady.
«Búgingi tańda kardıologııada zaman talabyna saı kóptegen ózgerister boldy. Degenmen, kardıolog Sandıp Djaýhardyń jańa kitabynda aıtylǵandaı, baqytsyzdyq, kedeılik nemese kúızelis, teńsizdik sekildi emotsıonaldy faktorlardyń júrek aýrýlaryna ákelýi múmkin ekenin de eskerý kerek. ıAǵnı, tehnologııalyq progress jaǵdaıynda bıologııalyq júrek pen emotsııalyq júrektiń shekarasyn ajyratý qıynǵa soǵady», dep jazady avtor.
Maqalada júrektiń bıologııalyq mashına jáne óte mańyzdy organ ǵana emes, adamnyń emotsııasy jınalatyn oryn ekeni de aıtylady.
«Júrek romantıka men shynaıylyq, qorqynysh pen muńnyń sımvoly. Sondaı-aq ol qan aınalymyna jaýap beretin sorǵy (nasos). Adam ómirinde júrek ortasha eseppen úsh mıllıard ret soǵady eken. Sondyqtan da bolar, hırýrgter 19-ǵasyrǵa deıin júrekke operatsııa jasamaǵan. Al búginde júrek aýrýynan qaza tabatyndar sany artty. Soǵan qaramastan emotsıonaldy densaýlyqtyń júrek aýrýlaryna áserine kóńil bólinbeı keledi», dep jazylǵan maqalada.
