Emmanıýel Makron Frantsııada fýtbolshylar qalaı daıyndalatynyn aıtyp berdi

Frantsııa prezıdenti Emmanıýel Makron Maqsut Narikbayev University stýdentterimen kezdesýde óz elindegi fýtboldy damytý tájirıbesi týraly aıtyp berdi, dep habarlaıdy Kazinform. 

Frantsııa basshysy óz elinde fýtboldyń óte tanymal sport ekenin atap ótti.

«Bizde mıllıondaǵan lıtsenzııalanǵan oıynshylar bar, olardyń arasynan tańdaý múmkindigi bar. Bizde emıgranttar arasynda da jastar óte kóp, olardyń arasynda fýtbol – tanymal sport túri. Eń aldymen, fýtbol basqa sport túrlerimen salystyrǵanda eń kóp jastardy tartatynyn aıtqym keledi. Eń bastysy – jaqsy bazanyń bolýy. Ekinshiden, bizdiń klýbtar óte belsendi jumys istedi, jas oıynshylardy iriktep aldy», - dedi Emmanýel Makron.

E.Makron sportshylardyń alǵashqy daıarlyǵynyń óte mańyzdy ekenin, mektepterde olardyń belsendiligin qoldaý keregin jetkizdi.

«Biz qazirdiń ózinde bastaýysh mektepte jarty saǵattyq sportty, sodan keıin orta mektepte aptasyna 2 saǵattyq sportty engizdik. Eń aldymen, oıynshylardy erte jastan daıyndaý kerek. Sondaı-aq sportta qundylyqtar óte mańyzdy. Meniń oıymsha, bul – báriniń aldynda turǵan mańyzdy syn-qaterdiń biri. Bizdiń sportshylarymyz jaqsy adamdar bolýy kerek jáne basqalardy óz úlgisimen shabyttandyrýy kerek», - dep esepteıdi Frantsııa prezıdenti.