Emıssııa tólemderi tek ekologııalyq sharalarǵa jumsalady – Maǵzum Myrzaǵalıev

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev IX Azamattyq forýmda jańa Ekologııalyq kodekstiń mańyzdy baǵyttaryn túsindirdi, dep habarlaıdy QazAqparat tilshisi.

Mınıstrdiń aıtýynsha, qazirgi ýaqytta ekologııalyq tólemder qorshaǵan ortaǵa zııandy áserdi azaıtý úshin emes, bıýdjetti tolyqtyrý kózi retinde ǵana qabyldanyp otyr.

«Qazirgi zańnamada emıssııa úshin túsken tólemderdi tabıǵatty qorǵaý sharalaryna jumsaý mindettelmegen. Saldarynan ákimdikterge túsetin qarajattyń tek 45%-y ǵana ekologııaǵa bólinedi (2019 jyly – 87 mlrd teńge). Osyǵan baılanysty (jańa kodekste) emıssııa tólemderiniń barlyq 100% tek ekologııalyq is-sharalarǵa jumsalatyn bolady.

Sońǵy kezderi baıqalǵan tabıǵatty qorlaý faktileri lastaýshy adamǵa (jeke jáne zańdy tulǵaǵa) «ekologııalyq taza» bolýdan góri aıyppuldardy «ýaqytyly» tóleýdiń ońaıyraq ekenin kórsetedi. Osyǵan baılanysty ákimshilik aıyppuldardyń mólsherin ulǵaıtý kózdelgen», - dep óz sózin tolyqtyrdy Ekologııa mınıstri.

Ótken jyldyń sońynda jańa Ekologııalyq kodekstiń jobasy Parlament Májilisine engizildi. Qyrkúıek aıynan bastap kún saıyn jumys toptarynyń otyrystary ótti. Kodeks taıaýda ekinshi oqylymnan ótip, Parlament Senatyna engizildi.