Emirates kompanııasynyń jolaýshylary ushaqta Starlink ınternetin paıdalana alady

ASTANA. KAZINFORM – Emirates áýe kompanııasy osy aıdan bastap barlyq ushaqtaryna SpaceX kompanııasynyń Starlink júıesin ornatyp, jolaýshylarǵa salonda óte jyldam, tegin Wi-Fi usynady.

Endi jolaýshylar ushý kezinde oryndyqtaǵy ekrandar men jeke qurylǵylar arqyly bir ýaqytta kontent taratýǵa, oıyn oınaýǵa, qońyraý shalýǵa, jumys isteýge jáne áleýmettik jelilerdi paıdalanýǵa múmkindik alady, dep habarlaıdy MSN. 

Birqatar premıým ónimderdi usynǵan álemdegi eń iri halyqaralyq áýe kompanııasy Starlink baılanysy ornatylatyn Boeing jáne Airbus ushaqtaryn jańartýǵa 5 mlrd dollar ınvestıtsııa salady.

Áýe kompanııasy 23 qarashadan bastap Boeing 777 kommertsııalyq reısinde Starlink qyzmetterin usyna bastaıdy, sodan keıin 2027 jyldyń ortasyna qaraı tolyq baǵdarlamany barlyq 232 keń fıýzelıajdy Boeing jáne Airbus ushaqtarynda aıaqtaıdy.

Emirates aıyna shamamen 14 ushaqty Starlink júıesimen jabdyqtaıdy, al 2026 jyldyń aqpan aıynda «jahandyq spýtnıktik ınternet júıesimen jabdyqtalǵan álemdegi alǵashqy A380 ushaǵyn» tanystyrady.

- Tegin, asa jyldam qyzmet kreıserlik bıiktikte jer deńgeıindegi ınternet sapasyn qamtamasyz etedi, - delingen áýe kompanııasynyń habarlamasynda.

Emirates prezıdenti Tım Klark Starlink-pen seriktestik klıentterdi qoldaý jolyndaǵy «taǵy bir sheshýshi sát» ekenin málimdedi.

- Biz álemdegi eń jyldam Wi-Fi jelisin engizip, jolaýshylarǵa arnalǵan baılanysty jańa deńgeıge shyǵaryp jatyrmyz, sonyń ishinde úzdiksiz jumys, jaqyndarymen naqty ýaqyt rejıminde baılanys, - dedi ol.

Emirates kompanııasynyń Starlink qyzmeti onyń borttyq ónimderge iri ınvestıtsııalar salý aıasynda paıda boldy, ol A380 qonaq bólmesi jáne birinshi klasty dýsh kabınalary sııaqty erekshe usynystardy tolyqtyryp otyr.

Starlink qazirdiń ózinde Taıaý Shyǵystyń keıbir bólikterinde, sonyń ishinde Qatar, Oman, Bahreın jáne Iordanııada qoljetimdi. Qyrkúıek aıynda jeli Lıvanda da lıtsenzııa aldy jáne sol jerde iske qosýǵa daıyndalyp jatyr.

Qatar Airways 2024 jyldyń qazan aıynda Boeing 777 ushaǵynda Starlink qyzmetin iske qosyp, Airbus A350 ushaqtaryn onymen jabdyqtaı bastaǵan kezde Taıaý Shyǵysta óz ushaqtaryna Starlink ornatqan alǵashqy áýe kompanııasy boldy.

Buǵan deıin «Astana – Arqalyq» baǵytynda júretin poıyzda Starlink spýtnıktik ınterneti qosylǵanyn jazǵan bolatynbyz.