«Emirates» áýe kompanııasy Qazaqstanǵa turaqty reıs ashady
NUR-SULTAN. QazAqparat - «Emirates» áýe kompanııasy Qazaqstanǵa turaqty reıster ashýy múmkin. Bul týraly QR IIDM Azamattyq avıatsııa komıteti Feısbýktegi paraqshasynda jazdy, dep habarlaıdy QazAqparat tilshisi.
"Azamattyq avıatsııa komıteti Nur-Sultan qalasynyń jáne «Astana» halyqaralyq qarjy ortalyǵynyń kóliktik qoljetimdiligin arttyrý boıynsha jumystardy jalǵastyrýda.
Qazirgi ýaqytta Qazaqstan Respýblıkasy men Birikken Arab Ámirlikteri arasyndaǵy turaqty áýe qatynasyn 4 áýe kompanııa («Eır Astana», «Etıhad», «Fly Dubai», «Air Arabia») júzege asyryp keledi. Qazaqstandyq avıakompanııa aptasyna 12 ret Nur-Sultan, Almaty jáne Dýbaı qalalary arasynda ushýlardy oryndaıdy. BAÁ kompanııalarynyń ushaqtary Ábý-Dabı, Dýbaı, Shardja jáne Nur-Sultan, Almaty qalalary arasynda aptasyna 16 ret qyzmet kórsetedi. Eki el arasynda aptasyna 28 reıs oryndalady", - delingen taratylǵan aqparatta.
Vedomstvo aqparatyna səıkes, QR IIDM Azamattyq avıatsııa Komıtetiniń tóraǵasy Talǵat Lastaev Birikken Arab Ámirlikteriniń Qazaqstan Respýblıkasyndaǵy Tótenshe jáne Ókiletti Elshisi Muhammed ál-Jabermen kezdesý ótkizdi.
Kezdesý barysynda eki el arasyndaǵy áýe qatynasyn odan ári keńeıtý máseleleri talqylandy.
"Qazaqstan Respýblıkasy men Birikken Arab Ámirlikteriniń avıatsııalyq bılik organdarynyń arasynda ekijaqty keńester ótkizý múmkindigi, sondaı-aq «Emirates» áýe kompanııasynyń Qazaqstanǵa turaqty reıster ashý múmkindigi qarastyryldy.
Eki el arasyndaǵy áýe qatynasyn ári qaraı keńeıtý elder arasyndaǵy qarym-qatynastardy nyǵaıtýǵa, sondaı-aq týrızmdi tabysty damytýǵa yqpal etedi", - dedi komıtetten.
