Emır Baıǵazınniń fılmi «Azııalyq Oskar» baıqaýyna qatysyp jatyr
ASTANA. QazAqparat - «Azııalyq Oskar» retinde tanylǵan, jyl saıyn ótetin «Asia Pacific Screen Awards» beldi kınojúldesi úmitkerlerdiń tizimin jarııalady, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
Qazaqstandyq rejısser Emır Baıǵazınniń «Ózen» fılmi «Rejıssýradaǵy tabystar» nomınatsııasynan kórinip otyr. 12-shi Asia Pacific Screen Awards júldesiniń jeńimpazdaryn Aýstralııanyń Brısben qalasynda 29 qarashada jarııalaıtyn bolady.
Aıta ketsek, Emır Baıǵazın 2013 jyly «Aslannyń sabaqtary» fılmi úshin osy atalymda baq synap, kınojúldeniń joǵary baǵasyna ıe bolǵan (Hight commendation) edi.
Odan bólek, «Ózen» fılmi Los-Andjeleste ótetin Asian World film festival kınofestıvaliniń konkýrstyq baǵdarlamasyna qatysady. Sondaı-aq, atalǵan kınotýyndy Varshavadaǵy jáne San Paolodaǵy festıvaldiń arnaıy baǵdarlamalarynda kórsetiledi. Al «Ózen» fılminiń azııalyq tusaýkeseri ústimizdegi jyly 25 qazan men 3 qarashada Tokıodaǵy halyqaralyq kınofestıvaldiń konkýrstyq baǵdarlamasy sheńberinde ótedi.
«Ózen» fılmine qatysty jańalyqtar meni jáne meniń komandamdy árıne qýantady. Osy oraıda, komandama alǵysymdy bildirgim keledi. Olar tek maǵan emes, sonymen qatar meniń ıdeıalaryma qashan da adal. Sondaı-aq, maǵan qoldaý kórsetip, senim bildirgen Mádenıet jáne sport mınıstrliginiń bashylyǵyna alǵys aıtamyn. Bolashaqta da qarym-qatynastarymyz nyǵaıyp, ortaq tabystarǵa qol jetkizetinimizge senimdimin», - dedi rejısser.
Aıta keterligi, «Ózen» fılminiń álemdik tusaýkeseri Venetsııa kınofestıvali sheńberinde ótken bolatyn.
Eske sala ketsek, buǵan deıin Emır Baıǵazınniń «Ózen» fılmi Gollıvýdtik baspasóz qaýymdastyǵynyń grantyn alǵan bolatyn.
