Emır Baıǵazın shyǵarmashylyq josparymen bólisti
ASTANA. QazAqparat - QR Mádenıet jáne sport mınıstri Arystanbek Muhamedıuly belgili rejısser Emır Baıǵazınmen kezdesip, otandyq kınonyń bolashaǵy týraly áńgime órbitti, dep habarlaıdy QazAqparat tilshisi.
«Jýyq arada men Los-Andjeles rezıdentsııasyna barýdy josparlap otyrmyn. «Ózen» kartınasy úshin HFPA grantyn ıelendim. Amerıkada ózimniń kelesi jobamdy damytýǵa den qoısam dep otyrmyn. Sol jaqtan kelesi jobanyń tolyqqandy stsenarıimen oralyp, 2019 jyldyń kóktemine qaraı jobanyń daıyndyǵyna kirisip ketsem deımin», - deıdi rejısser.
Emır Baıǵazınniń aıtýynsha, qazaqstandyq kınoındýstrııanyń deńgeıi jaman emes. Naqtyraq aıtqanda, Baıǵazınniń paıymynsha kommertsııalyq kartınalardyń ósimi aıqyn baıqalady.
«Eń birinshi kezekte, men kásibı qalpymdy saqtaý úshin kıno túsiretinimdi aıta ketkim keledi. Meniń oıymsha, aldymen júlde jaıly oılaıtyn bolsaq, munymyz durys bolmas edi. Mine, sondyqtan, eń aldymen kartınada ne kórsetkim kelgenin jetkizgim keledi. Naqty qolǵa alyp jatqan jobam arqyly men shyǵarmashylyǵymdy shyńdaýdy oılaımyn», - deıdi Emır Baıǵazın.
Óz kezeginde Mádenıet jáne sport mınıstri Arystanbek Muhamedıuly «Ózen» fılmi úshin rejısserdiń alǵan júldelerimen quttyqtady.
«Emır Baıǵazın qazaq kınotarıhynda tuńǵysh ret bıik jetistikke qol jetkizip otyr. Buǵan óte qýanyshtymyz. Ol Venetsııadaǵy kınofestıvalde «Kókjıek» baǵdarlamasynda nomınant atandy. Kıno óneri salasynda bizde buryn mundaı jetistiktiń bolmaǵanyn aıta alamyn. Barlyq qazaqstandyqtardyń atynan Emır Baıǵazındi osy jetistigimen quttyqtaǵym keledi», - dedi Arystanbek Muhamedıuly.
