Emınem men Shakıra Almatyda óner kórsetýi múmkin: ákimdik ne deıdi
ALMATY. KAZINFORM – Álemdik estrada juldyzdary – rep oryndaýshy Emınem men ánshi Shakıra 2026 jyly Almatyda kontsert berýi múmkin. Alaıda bul kontsertterdiń ótetin kúni men orny ázirshe naqty belgilenbegen. Bul týraly agenttik tilshisine Almaty ákimdiginiń baspasóz qyzmeti habarlandy.
Qoǵamdyq keńestiń №5 komıssııa otyrysynda «Sporttyq nysandar dırektsııasy» JShS bas dırektory Eset Baıtasov Almatyda álemdik deńgeıdegi eki ánshiniń halyqaralyq gastroldik týry aıasynda óner kórsetýi múmkin ekeni jóninde aldyn ala aqparat bergen.
Alaıda qazirgi ýaqytta Emınem men Shakıranyń kontsertine qatysty resmı qujat júzinde bekitilgen kelisimder joq ekeni belgili boldy.
– Atalǵan aqparat tanystyrý sıpatynda ǵana aıtylǵan jáne is-sharalardyń ótetinin bildirmeıdi. Qazirgi tańda másele pysyqtalyp jatyr. Resmı kelisimder jasalǵan joq, kúni men orny da bekitilmedi. Tıisti barlyq kelissóz aıaqtalǵannan keıin resmı aqparat qosymsha beriledi, - dep habarlady Almaty ákimdigi.
Aıta keteıik, 2025 jyly Almatydaǵy Ortalyq stadıonda álemdik juldyz Djennıfer Lopestiń kontserti ótken edi.
