Emın Áskerov: Áleýmettik kásipkerler qoǵamdyq máselelerdi sheship qana qoımaı, bıýdjetti de tolyqtyrady
«Áleýmettik kásipkerler – bul kez kelgen áleýmettik máselelerdi sheshýge baǵyttalǵan kásiporyndardy quratyn adamdar. Mysaly óz basym 2015 jyly Green Tal áleýmettik sheberhanasynyń negizin qaladym. Ol 9 túrli baǵyttan turady. Olar: aǵash ustasy, tigin, kıiz sheberhanalary, kafeler, avtokólik jýý jáne taǵy basqa. Biz áleýmettik sanattaǵy azamattardy jumyspen qamtý máselelerin sheshemiz. Bizdiń joba sheńberinde 80-ge jýyq qyzmetker eńbek etedi, olardyń 95%-y áleýmettik sanatqa jatatyn azamattar. Árıne, biz jastarǵa nazar aýdarýǵa tyrysamyz. Óıtkeni olar oılaǵanyn iske asyra almaı shektelse, qınalatynyn túsinemiz», - dedi Emın Áskerov onlaın rejımde «Bolashaq» qaýymdastyǵynyń uıymdastyrýymen ótken «Jastar jáne ınnovatsııalar» forýmynda.
Onyń aıtýynsha keıingi kezderi ókinishke qaraı Qazaqstanda shızofrenııa men aýtızm aýrýy bar balalardyń sany ósip bara jatyr.
«Siz dıspanserlik esepte tursańyz, onda ókinishke qaraı jumysqa qabiletsiz azamat sanalasyz. Biz bul taptaýryndy buzyp, olaı emes ekenin naqty mysaldarmen dáleldeýge tyrysamyz. Ol sanattaǵy azamattar - ózderin jumys ornynda shynymen kórsete alatyn qyzmetkerler. Barlyq jumysymyz arqyly áleýmettik sanattaǵy azamattar teń múmkindikterge laıyqty bolýyn dáleldegimiz keledi», - deıdi ol.
Emın Áskerov Qazaqstanda áleýmettik kásipkerlik týraly zań ázirlenip jatqanyn, al Reseıde soǵan uqsas zań ótken jyly qabyldanǵanyn málim etti.
«Mysaly Qazaqstanda 300-ge jýyq áleýmettik kásipker bar. Al Ulybrıtanııada olardyń sany 70 myńnan asady. Ol eldegi áleýmettik kásipkerlerdiń salyqtyq túsimderinen túsetin soma JІÓ-niń 10%-dyq úlesin quraıdy. Áleýmettik kásipkerler áleýmettik máselelerdi sheship qana qoımaı, memlekettik bıýdjetti tolyqtyrady», - dedi Emın Áskerov.
