Emhanalardyń jumysy qashyqtan qyzmet kórsetý formatyna aýystyryldy

NUR-SULTAN. QazAqparat – QR densaýlyq saqtaý vıtse-mınıstri Ajar Gınııat elimizdegi emhanalardyń jumysy qashyqtan qyzmet kórsetý formatyna aýystyrylǵanyn málim etti, dep habarlaıdy QazAqparat tilshisi.

«Birinshiden, ýchaskelik jáne konsýltatsııalyq qyzmetter múmkindiginshe qashyqtyqtan kórsetilýi tıis. Ekinshiden, josparly kómek pen dıagnostıkalyq qyzmetter qatań túrde dárigerlerdiń kórsetilimderi boıynsha onlaın jazý arqyly júzege asyrylady. Emhanaǵa azamattar aldyn ala kúni buryn shaqyrtylady. Emhanalarda qazirgi jaǵdaıda kezek kútýge, kóp adam jınaýǵa jol bermeý kerek. Búgingi kúni jumysty kóshpeli mobıldi brıgada arqyly uıymdastyrýdy jalǵastyrýdamyz. Osy tańda 383 kóshpeli mobıldi brıgada jumys isteýde», - dedi ol OKQ-da ótken baspasóz máslıhatynda.

Vıtse-mınıstrdiń aıtýynsha, osy mobıldi toptardyń bir túri KVI boıynsha test alady. Onda meıirbıkeler jumys isteıdi.

«Brıgadanyń ekinshi túri – KVI rastalǵan naýqastarǵa úıde qyzmet kórsetedi. Qazirgi ýaqytta 165 myń patsıent ambýlatorııalyq jaǵdaıda kómek alýda. Brıgadanyń úshinshi túri – sozylmaly aýrýlary, onkologııalyq aýrýlary bar adamdarǵa, júkti áıelder men balalarǵa kómek kórsetedi», - dedi ol.