Emhanalarda pedıatrlardyń qabyldaýy qaıta jandanady - Tamara Dúısenova
ASTANA. QazAqparat - Bıyldyń sońyna deıin qazaqstandyq emhanalarda balalardy pedıatrlardyń jekeleı qabyldaýy qaıta jandanady.
Bul týraly búgin Úkimet otyrysynan keıingi baspasóz máslıhatynda QR Densaýlyq saqtaý jáne áleýmettik damý mınıstri Tamara Dúısenova málim etti.
«Jalpy, pedıatrlyq fakýltetter jabylǵan joq. Densaýlyq saqtaý qurylymyndaǵy bilim berý baǵdarlamasyna qaraıtyn bolsaq, ol eki bólikke bólinedi. Birinshisi, bazalyq bólim, ıaǵnı onda tańdaǵan mamandyǵyna qaramastan barlyǵy oqytylady»,-dep túsindirdi T. Dúısenova.
Oqytýdyń ekinshi bóliminde stýdentter mamandyqtar boıynsha bólinip, naqty baǵytta bilim alady.
«Osy rette biz bıyl pedıatrııa mamandary úshin jáne magıstratýra baǵytynda da baǵdarlamany keńeıttik. Sondyqtan da pedıatr fakýltetterin joq dep aıtý durys emes»,-dedi mınıstr.
Sóz sońynda ol búginde emhanalarda balalardy pedıatrlardyń bólek qabyldaýy baǵytyn qaıta jańǵyrtý máselesi qarastyrylyp jatqandyǵyn, sondaı-aq jyl sońyna deıin bul másele sheshimin tabatynyn atap ótti.
Budan buryn habarlaǵandaı, Bala quqyqtary jónindegi ýákil, QR Parlamenti Májilisiniń depýtaty Zaǵıpa Balıeva bilim berý júıesine pedıatrııa ınstıtýtyn jandandyrý boıynsha belsendi jumystar júrgizip jatqandyǵyn aıtqan bolatyn.
Medıtsınalyq joǵary oqý oryndarynyń úderisi jetildirilgenin eske salyp ótken ol, osy rette pedıatrııa fakýlteti emdeý fakýltetimen biriktirilgenin atap ótti. Bul turǵyda Qazaqstan Respýblıkasyndaǵy Bala quqyqtary jónindegi ýákil retinde Z. Balıeva osymen kelispeıtinin jetkizdi.
Onyń paıymynsha, kez kelgen pedıatr eresek adamǵa em-dom jasasa da, alaıda terapevt balany emdeı almaıdy. Sebebi, sábıdiń aǵzasy eresek adamnan ózgeshe bolǵandyqtan, bul baǵytta tıisti qadamdar bolýy tıis.
