Emhanalar tolyǵymen elektrondy formatqa kóshti - DSM

ASTANA. QazAqparat - QR Densaýlyq saqtaý mınıstrligi aýdan ortalyqtaryna deıin barlyq emxananyń jumysyn elektrondy formatqa aýystyrǵanyn málimdedi. Endigi maqsat - ondaı qyzmetterdi aýyl emxanalaryna jetkizý, dep xabarlaıdy QazAqparat tilshisi.

QR Densaýlyq saqtaý vıtse-mınıstri Oljas Ábishevtiń aıtýynsha, ótken jyly medıtsınalyq mekemelerdi kompıýtermen jabdyqtaý, ınternet jelisin jetkizý jáne arnaıy aqparattyq júıelerdi ornatý boıynsha biraz jumystar atqaryldy. Osynyń nátıjesinde ortalyq aýdandarǵa deıin barlyq aýrýxanalar elektrondy formatta jumys isteı bastady.

«Bul degenimiz, atalǵan mekemeler qaǵazbastylyqtan qutyldy degen sóz. Sonyń arqasynda biz 250 mıllıon teńgeni únemdep otyrmyz. Buryn ol aqshaǵa qaǵaz, flıýroplenka jáne taǵy basqa zattar satyp alynatyn. Bıyl biz osy saladaǵy jumysty jalǵastyratyn bolamyz. Sebebi aýdan deńgeıinen tómen medıtsınalyq mekemelerde ınternet áli joq. Aqparat jáne kommýnıkatsııalar mınıstrligimen birlese otyryp, 2021 jylǵa deıin aýyl emxanalaryn da tolyǵymen elektrondy formatqa aýystyrýdy josparlap otyrmyz», - dedi O.Ábishev Astanada ótken bapsasóz máslıxatynda.

QR Densaýlyq saqtaý mınıstrligi taratqan málimetke sáıkes, medıtsınalyq mekemelerdiń jumysyn elektrondy formatqa aýystyrý nátıjesinde xalyqtyń emxanaǵa barýy eki esege azaıdy. Kezek kútý ýaqyty da eki esege (30 mınýttan 15 mınýtqa) qysqardy. Dárigerler men patsıentterdiń biraz ýaqyty únemdelip otyr. Mınıstrlik bolsa, jylyna 3 200 tonna qaǵazdyń aqshasyn únemdeı alady.