Emhanaǵa tirkelý quqyǵy: Dárigerlerge artyq júkteme artylýy múmkin
NUR-SULTAN. QazAqparat – El turǵyndary ózderi qalaǵan emhanaǵa tirkele alatyny buǵan deıin habarlanǵan bolatyn. Alaıda Nur-Sultan qalalyq №8 emhananyń dırektory Aıgúl Qasymova bul rette emhanalar úshin qandaı másele týyndap otyrǵanyn aıtyp berdi, dep habarlaıdy QazAqparat tilshisi.
«15 qyrkúıekten bastap elimizdiń ár turǵyny ózi qalaǵan emhanaǵa tirkele alady. Biraq árbir emhana óziniń bekitilgen aımaǵy boıynsha jumys isteıdi. Emhanadaǵy ár dárigerlerdiń mindeti bar. Birinshiden pedıatr nemese terapevt bolsyn, óz aýdanyndaǵy turǵyndardy emhanada qabyldap qana qoımaı, keı emdelýshiniń úıine baryp ta dárigerlik qyzmetin kórsetýi kerek. Ekinshiden, ár emhananyń óz syıymdylyǵy bolady. Bizdiń emhananyń, máselen, 60 myń halyqty tirkeýge múmkinshiligi bar. Sol sebepti halyq basqa aımaqtan kelip tirkelem degen jaǵdaıda da olardy qabyldaıtyn múmkinshiligimiz joq», - dedi Aıgúl Qasymova tilshilerdiń suraǵyna bergen jaýabynda.
Sol sebepti Aıgúl Qasymova elordalyqtardy óz úıine jaqyn emhanaǵa tirkelýge shaqyrdy.
«Keıbireýler ózine unamaıtyn dárigerge qaralǵysy kelmese, bizdiń emhanadaǵy basqa dárigerlerge de jazyla alady. Ondaı quqyq bar», - dedi ol.
Aıgúl Qasymova qazirgi ýaqytta Nur-Sultan qalalyq №8 emhanaǵa qaraıtyn 41 ýchaske baryn, onda 38 dáriger jumys isteıtin aıtady.
«Olardan eki ese kóp meıirbıkeler bar. Solardyń bári bizdiń emhanaǵa tirkelgen 66 700 adamǵa qyzmet kórsetedi. Sonda eseptep qarasańyz, 1 dárigerge 1700 adamnan keledi. Sapaly qyzmet kórsetip, josparly jumysyn atqarýy úshin dáriger óz júktemesinen artyq jumys atqarmaýy tıis. ıAǵnı adam sany 1700-den asyp ketse, biz tirkeı almaımyz», - dedi ol.
Eske sala ketsek, QR Densaýlyq saqtaý mınıstrliginiń resmı ókili Baǵdat Qojahmetov buǵan deıin 15 qyrkúıek pen 15 qarasha aralyǵynda el turǵyndary ózderi qalaǵan emhanaǵa tirkele alatynyn jarııalaǵan bolatyn.
