Emhanaǵa baryp, dárigerge jazyla almaı júrgenderge qatysty shara qabyldanady
ASTANA. KAZINFORM — Densaýlyq saqtaý mınıstri Aqmaral Álnazarova emhanalarda medıtsınalyq kómektiń qoljetimdiligin baqylaýdy kúsheıtýdi tapsyrdy.
Qazan aıynan bastap óńirlerde MSAK uıymdarynyń jumysyna júıeli taldaý júrgiziledi, al ýchaskelik dárigerler men beıindi mamandarǵa jazylý múmkindigi ár eki apta saıyn monıtorıngten ótedi. Keńeste Densaýlyq saqtaý mınıstrliginiń basshysy patsıenttiń eshqandaı artyq uıymdastyrýshylyq kedergisiz dárigerge jazylyp, qajetti medıtsınalyq kómek alýyna naqty múmkindigi bolýy tıis ekenin atap ótti.
— Eger adam emhanaǵa baryp, dárigerge jazyla almasa, medıtsınalyq kómektiń qoljetimdiligi týraly qalaı aıtýǵa bolady? Bul — jergilikti jerde qamtamasyz etilýge tıis bazalyq máseleler, — dedi Aqmaral Álnazarova.
Densaýlyq saqtaý mınıstrliginiń Medıtsınalyq baqylaý komıtetiniń tóraıymy Laýrra Ahmetnııazdyń habarlaýynsha júrgizilgen taldaý barysynda patsıentterdiń ýchaskelik dárigerlerge de, beıindi mamandarǵa da óz betinshe jazylýyna qatysty shekteýler anyqtalǵan. Birqatar medıtsınalyq uıymdarda qabyldaý kesteleri qalyptastyrylǵanymen, patsıentterdiń óz betinshe qabyldaýǵa jazylý múmkindigi áli de shekteýli bolyp otyr.
— Problema tek qabyldaý kesteleriniń bolýynda emes patsıenttiń qabyldaýǵa óz betinshe jazyla alý múmkindiginde. Anyqtalǵan kemshilikter boıynsha medıtsınalyq uıymdarǵa tıisti usynymdar jiberiledi, — dedi Komıtet tóraıymy.
Mınıstr densaýlyq saqtaý basqarmalaryna medıtsınalyq kómektiń qoljetimdiligin turaqty baqylaýda ustaýdy tapsyrdy.
— Halyqqa onlaın da, oflaın da qoljetimdi bolý qajet. Adam emhanaǵa kelip, ózine qajetti barlyq aqparatty alýy tıis. Dárigerge jazylý múmkindigin qamtamasyz etý — jergilikti jerlerdegi densaýlyq saqtaý júıesiniń kúndelikti jumysy, — dep atap ótti ol.
Qazan aıynan bastap aýmaqtyq bólimsheler men beıindi departamentter MSAK uıymdarynyń belgilengen standarttarǵa sáıkestigine keshendi taldaý júrgize bastaıdy. Tekserý tek dárigerlerge jazylý múmkindigimen shektelmeı, medıtsınalyq kómekti uıymdastyrýdyń jalpy máselelerin de qamtıdy.
Buǵan deıin emhanalarda pedıatrııalyq ýchaskeler qaıta jumys isteıtinin jazdyq.
