Emhanada 50 adam kezekte tur: almatylyqtar qalada juqpaly aýrýlar tarap jatqanyn baıqady
ALMATY. KAZINFORM — Almatylyqtar balalar arasynda juqpaly aýrýlar kóbeıip, emhanada oryn tabý qıyndaǵanyn aıtyp jatyr.
Jeli qoldanýshysy Almatydaǵy emhananyń qabyldaý bóliminde 50 adamnan kezek turǵanyn kórsetip beınejazba jarııalady. Onyń aıtýynsha, ásirese aýrý juqtyrǵan balalar kóp.
— Aýyryp jatqandar óte kóp, ásirese balalar. Kóbinde belgileri birdeı: qyzýy 39–40 °C-qa deıin kóteriledi, áreń túsedi de, qaıtadan kóterilip ketedi. Bizdiń de balamyz aýyryp jatyr, — dep jazdy ol.
Atalǵan jazbaǵa Almaty qalasynyń Balalar klınıkalyq juqpaly aýrýlar aýrýhanasy pikir bildirdi. Medıtsınalyq mekeme málimetinshe, qalada JRVI men tumaýdyń maýsymdyq ósýine baılanysty balalardy aýrýhanaǵa jatqyzýǵa arnalǵan tósek-oryn sany ulǵaıtylyp jatyr. Emhana dúrbeleń salýǵa negiz joq ekenin atap ótti.
— Medıtsınalyq uıymdar medıtsınalyq kómektiń qoljetimdiligin qamtamasyz etý úshin qajetti sharalardy qabyldap jatyr. Balalar qalalyq klınıkalyq juqpaly aýrýlar aýrýhanasynda qosymsha 67 rezervtik tósek-oryn ashý qarastyrylǵan. Osylaısha, tósek-oryn qory 360-tan 427 orynǵa deıin artady, — delingen mekeme jaýabynda.
Epıdemıologııalyq ahýal
Al Almaty qalasynyń sanıtarııalyq-epıdemıologııalyq baqylaý departamenti qazir megapolıstegi JRVI boıynsha epıdemıologııalyq ahýal turaqty ekenin málimdedi. Departament jaýabyna sáıkes, baqylaý deńgeıiniń kórsetkishinen aspaıtyn jyl saıynǵy maýsymdyq ósý ǵana baıqalady.
— Epıdemıologııalyq maýsym bastalǵaly beri grıpptiń rastalǵan 25 jaǵdaıy tirkeldi. Zerthanalyq monıtorıng nátıjeleri boıynsha qalada tumaý vırýsynyń eki túri, onyń ishinde A/H1N1 jáne B tıpteri aınalymda júr. Sonymen qatar rınovırýs, paragrıpp, RS-vırýs, bokavırýs jáne maýsymdyq koronavırýs sııaqty tumaýǵa jatpaıtyn basqa da JRVI vırýstary taralyp jatyr. Jańa belgisiz vırýstar anyqtalǵan joq, — dedi SEBD ókilderi.
Sonymen qatar medıtsınalyq uıymdarda birqatar daıyndyq is-sharalary júrgizilgeni atap ótildi. Onyń ishinde ambýlatorııalyq-emhanalyq jelide úıge shaqyrtýlarǵa qyzmet kórsetý úshin mobıldi brıgadalar qurylyp, JRVI men tumaý belgileri bar adamdardy qabyldaýǵa arnalǵan súzgi kabınetteri uıymdastyrylǵan. 2026 jylǵy 19 qarashadaǵy jaǵdaı boıynsha tumaýǵa qarsy barlyǵy 251 102 adam ekpe alǵan, onyń ishinde 248 780 adam «qaýip tobyna» jatady.
Úıde ne isteý qajet
Balalar qalalyq klınıkalyq juqpaly aýrýlar aýrýhanasy jelidegi paraqshasynda tumaý juqtyrǵan ata-analarǵa ne isteý kerektigi týraly nusqama berdi:
- Balanyń tynyǵýyn qamtamasyz etý.
- Suıyqtyqty az mólsherde, biraq jıi berý.
- Bólmeni únemi jeldetip turý.
- Dene qyzýy men tynys alýyn baqylaý.
- Dárigerdiń taǵaıyndaýynsyz antıbıotıkter men vırýsqa qarsy preparattardy bermeý.
— Óz betińizshe emdelmeý mańyzdy. JRVI-diń árbir jaǵdaıy aýrýhanaǵa jatqyzýdy qajet etpeıdi. Gospıtalızatsııalaý týraly sheshimdi dáriger balany qarap, jaǵdaıyn baǵalaǵannan keıin qabyldaıdy. Basty qaǵıda: alǵashqy belgiler baıqalǵanda — pedıatrǵa, qaýipti belgiler bolǵanda — 103 nómirine habarlasyńyz. Sondaı-aq Almaty qalasynda medıtsınalyq kómekti uıymdastyrý máseleleri boıynsha 1312 Biryńǵaı baılanys ortalyǵyna habarlasýǵa bolady, — dep keńes beredi dárigerler.
Eske salaıyq, Astanada JRVI men tumaýdyń aldyn alý úshin qandaı sharalar qabyldanyp jatqanyn jazǵanbyz.