Emhana arqyly 1,6 mlrd jymqyrǵan: Almaty oblysynda birqatar ekonomıkalyq qylmystyń beti ashyldy
QONAEV. KAZINFORM – Almaty oblysyndaǵy birqatar qurylys jobalarynda baǵa negizsiz joǵary qoıylǵany anyqtaldy.

Almaty oblysy boıynsha Ekonomıkalyq tergep-tekserý departamenti basshysynyń orynbasary Áset Jamanbaevtyń aıtýynsha, «aqshanyń izimen» qaǵıdatyn basshylyqqa ala otyryp tergeý - bıýdjet qarajatyn men kvazımemlekettik sektordyń qarajatyn urlaý faktilerin ashýǵa múmkindik bergen.
Atap aıtqanda, oblysta jeke medıtsınalyq uıymnyń basshylyǵy 1,6 mlrd teńge jymqyrǵany anyqtaldy. Uıym aýdandyq aýrýhanalardyń birin jáne onyń aýyldardaǵy ambýlatorııalaryn senimgerlik basqarýǵa alyp, turǵyndardy jalǵan esepteý arqyly tegin medıtsınalyq kómektiń kepildik berilgen kólemi sheńberinde bólingen 1,6 mlrd teńgeni urlaǵan.
- Urlanǵan qarajat baqylaýdaǵy kompanııalar arqyly ǵımarat satyp alý, ony jóndeý jáne medıtsınalyq jabdyqtar alý arqyly zańdastyrylǵan. Osy arqyly basty kúdikti medıtsınalyq ortalyq ashqan. Qazirgi ýaqytta tárkileý maqsatynda osy medıtsınalyq ortalyqqa jáne zańsyz tabysqa satyp alynǵan 8 avtokólikke tyıym salyndy, - dedi Áset Jamanbaev.
Sonymen qatar ol Talǵar aýdany men Qonaev qalasynda bıýdjet qarajatyn negizsiz jumsaýǵa jol berilmegenin atap ótti.
Onyń aıtýynsha, Qonaev qalasynda gazben jabdyqtaý jelilerin salýǵa 132 mln teńge, al Talǵar aýdany Elaman aýylynyń gaz qubyry men gaz taratý jelilerin salý qunyna 313 mln teńge negizsiz qosylǵan.
Eske salaıyq, buǵan deıin Atyraýda baǵany negizsiz ósirgen kásipkerlerge 2,8 mln teńge aıyppul salynǵanyn jazǵanbyz.