Emhana apattyq jaǵdaıda, jol joq: Abaı oblysyndaǵy aýyl halqy dabyl qaqty
SEMEI. KAZINFORM — Abaı oblysynda jańadan qurylǵan Jańasemeı aýdanyna qosylǵan Qaınar aýylynda kúrmeýin tappaı kele jatqan kúrdeli máseleler shash etekten. Kazinform redaktsııasyna habarlasqan aýyl turǵyndary sol máselelerdi jipke tizip berdi.
Balabaqsha joq, emhana aıanyshty kúıde
Jańasemeı aýdanyndaǵy Qaınar aýyly órkenıetten qalys qalǵandaı. Halyq óz muń-muqtajyn jergilikti bılikke talaı aıtqanyn, alaıda odan nátıje shyqpaı kele jatqanyn ashyna jetkizdi.
— Aýylda 1500-ge jýyq adam turady. Adamǵa eń áýeli ne kerek? Ol — aýyrǵanda emdeletin aýrýhana. Bizdiń aýyldaǵy emhana apattyq jaǵdaıda tur. Dáriger de tapshy. Ne sebepti emhana jóndelip, aýylǵa dáriger mamandar tartylmaıdy?! Osy jaıly ákimdikke aıta-aıta ábden sharshadyq, — deıdi aty-jónin jarııalamaýdy ótingen qaınarlyqtar.
Aýylda múlde balabaqsha joq eken. Sonyń saldarynan ata-analar búldirshinderin úıde qarap, jumysqa shyǵa almaı otyr.
— Mádenıet úıiniń ishi qysta azynap turady. Mekteppen birge qosylǵan qazandyqtyń jylytýǵa shamasy jetpeıdi. Halyq ishinde dirdektep tońyp otyrýǵa májbúr. Odan soń bıyl Aşysý ózeninen Qaınar aýylyna deıingi jol jóndelgen. Biraq jóndeý jumystarynyń sapasy óte nashar. Arada kóp ýaqyt ótpeı oıylyp-oıylyp qalǵan. Al Aşysý ózeni men Kógentaý arasyndaǵy joldyń sapasy múlde syn kótermeıdi. Ótken jyly tek shuńqyrlardy bitep qoıǵan. Aýylǵa ınternet te tartylmaǵan. Bylaısha aıtqanda nazardan tys qalǵan aýylmyz, — deıdi turǵyndar.
Ákimdik ne deıdi?
Bildeı bir aýyl jurtshylyǵynyń shaqshadaı basyn sharadaı qylǵan másele qashan jáne qalaı sheshiletinin bilý úshin Jańasemeı aýdany ákimdigine resmı saýalhat jiberdik.
Jaýap joldaǵan aýdan ákiminiń orynbasary Nurjan Zeınýllın Qaınar aýylynda 2025 jyldyń 1 naýryzyna deıin 50 oryndyq balabaqsha ashylatynyn málim etti.
— Búgingi tańda tıisti qujattardy daıyndaý, SES-ten ruqsat qaǵazyn alý jáne basqa da uıymdastyrý jumysy júrgizilip jatyr. Emhana boıynsha aıtar bolsaq, jańa dárigerlik ambýlatorııa salý týraly ulttyq jobaǵa usynys eńgizý maqsatynda Abaı oblysy ákiminiń orynbasaryna resmı hat joldadyq. Abyraly aýrýhanasynyń bas dárigeri Semeı medıtsına ýnıversıtetiniń túlekterin jumysqa shaqyrý jáne ártúrli áleýmettik jeliler arqyly jarnama jasaýdyń nátıjesinde 2 jas maman jazda jumysqa kelýdi josparlap otyr. Osy másele boıynsha Abaı oblysy densaýlyq saqtaý basqarmasyna kóterme qarajat qarastyrý týraly ótinim beriledi. Jańasemeı aýdany ákimshiligi tarapynan aq halattylar úımen qamtamasyz etiledi, — deıdi ol.
Nurjan Zeınýllınniń aıtýynsha, Jańasemeı aýdany men Qaınar aýylynyń ákimdikteri Mádenıet úıiniń qazandyǵyna qatysty máseleni qarastyryp jatyr.
Tolyq zerttelgennen keıin ǵana tıisti sheshim qabyldanbaq.
— «Semeı-Qaınar» — respýblıkalyq mańyzy bar jol. Sondyqtan ol QazAvtoJol teńgeriminde. 2024 jyly atalǵan jolǵa merdiger uıym «Semeı joldary» JShS-men 220-268-shaqyrymyna deıingi ýchaskede (jalpy uzyndyǵy — 48 shaqyrym) ortasha jol jóndeý jumysy júrgizildi. Sonymen qatar 2025 jyly atalǵan joldyń 88-111-shaqyrymyna deıingi ýchaskesinde (jalpy uzyndyǵy — 25 shaqyrym) ortasha jol jóndeý jumystaryn júrgizý kózdelgen. 2023 jylǵy 26 mamyrdaǵy oblys turǵyndaryn sapaly keń jolaqty ınternetke qosý jónindegi bekitilgen Jol kartasyna sáıkes, Jańasemeı aýdanynda Abyraly jáne Qaınar aýyldarynda 2027 jylǵa deıin antenna-machtalyq qurylym salynady. Qazirgi tańda jobalyq-smetalyq qujattamasyn ázirleý úshin bastapqy materıaldar ázirlenip jatyr, — deıdi aýdan ákiminiń orynbasary.
Eske salsaq, osyǵan deıin Abaı oblysy Jańasemeı aýdanyna jańa ákim taǵaıyndalǵany habarlanǵan.
