Emhana aldyndaǵy uzyn-sonar kezek: №7 klınıkalyq aýrýhana jaǵdaıdy túsindirdi
ALMATY. QazAqparat – Búgin Almatydaǵy №7 qalalyq klınıkalyq aýrýhana aldynda uzyn-sonar kezek paıda boldy, dep habarlaıdy QazAqparat tilshisi.
Áleýmettik jelide Almatydaǵy № 7 qalalyq klınıkalyq aýrýhana aldyndaǵy uzyn-sonar kezektiń vıdeosy paıda boldy. Beınejazbadan turǵyndardyń dárigerge qaralýǵa kirgizbeı jatqanyna shaǵymdanyp jatqanyn kórýge bolady.
Óz kezeginde №7 qalalyq klınıkalyq aýrýhananyń baspasóz qyzmeti emhana jumysy tańǵy saǵat 08: 00-de bastalatynyn aıtty. Al adamdar tańǵy 07: 00-den kelgen. Sondaı-aq, naýqastar aldyn ala jazylý arqyly qabyldanady.
«Koronavırýs ınfektsııasynyń taralýyna jol bermeý maqsatynda emhananyń kireberisinde kelýshilerge aldyn ala dezınfektsııa jumysy júrgiziledi. Qabyldaý kezinde naýqastar emhana ishinde áleýmettik araqashyqtyqty saqtaýy tıis. Emhana ujymy bul týraly únemi eskertedi, alaıda emhanaǵa kelýshilerdiń barlyǵy birdeı bul talapqa qulaq asa bermeıdi. Osy múmkindikti paıdalanyp, emhana ákimshiligi patsıentterinen sanıtarlyq normalardy saqtaýdy suraıdy», - dep jaýap berdi №7 qalalyq klınıkalyq aýrýhananyń baspasóz qyzmeti.
