Emhana aldyndaǵy skver saqtala ma – BQO densaýlyq saqtaý basqarmasy jaýap berdi
ORAL. KAZINFORM — Oral qalasynda №1 emhana aldyndaǵy skver máselesi pikirtalas ózegine aınalyp otyr.
Kazinform budan buryn habarlaǵanyndaı, ekologter saıabaqty saqtap qalý kerektigin kótergen bolatyn. Bul rette olar emhanaǵa qosymsha ǵımarat salynýyna baılanysty qoǵamdyq tyńdaý ótkizý qajettigin aıtyp otyr.
Osy máselege oraı agenttik tilshisi BQO Densaýlyq saqtaý basqarmasyna arnaıy saýal joldaǵan edi.
Basqarmadan túsken málimetke qaraǵanda, emhana ǵımaratyn keńeıtý qajettiligi patsıentterdi qabyldaýǵa arnalǵan qosymsha kabınetterge degen suranysqa, medıtsınalyq kómek kórsetý jaǵdaılaryn jaqsartýǵa jáne onyń halyq úshin qoljetimdiligin arttyrýǵa baılanysty.
Qazirgi ýaqytta emhanada patsıentterdi qabyldaýǵa arnalǵan kabınetter jetkiliksiz. Sonymen qatar kúndizgi statsıonar men zerthana ár túrli mekenjaılarda ornalasqan, bul patsıentterge qolaısyzdyqtar týǵyzady. Budan bólek, ǵımaratta lıftiniń bolmaýy egde jastaǵy adamdardyń, múgedektigi bar adamdardyń jáne júrip-turýy shekteýli azamattardyń qozǵalysyn qıyndatady. Osyǵan baılanysty emhananyń alańyn ulǵaıtý, qosymsha kabınetter ashý jáne medıtsınalyq qyzmetterdi alý úshin qolaıly jaǵdaılar jasaý maqsatynda japsarlas qurylys salý máselesi qarastyrylyp jatyr.
Jobany ázirleý barysynda aýmaqty kógaldandyrý jáne abattandyrý máseleleri eskerilgen. Jobalaý-smetalyq qujattamaǵa sáıkes, qurylys aýmaǵynda ár túrli aǵash túrleri men butalardy otyrǵyzý, gúlzarlar jasaý jáne kógal tóseý kózdelgen. Jobalyq sheshimder aýmaqtyń sáýlettik kelbetin jaqsartýǵa jáne jasyl jelekterdi qalyptastyrýǵa baǵyttalmaq.
Basqarma bergen málimet boıynsha Qazaqstan Respýblıkasynyń qoldanystaǵy zańnamasyna, onyń ishinde Densaýlyq saqtaý mınıstriniń 2020 jylǵy 13 qarashadaǵy № QR DSM-194/2020 «Alǵashqy medıtsınalyq-sanıtarııalyq kómek kórsetetin densaýlyq saqtaý uıymdaryna jeke tulǵalardy tirkeý qaǵıdalaryn bekitý týraly» buıryǵyna sáıkes azamattardy alǵashqy medıtsınalyq-sanıtarııalyq kómek kórsetetin uıymdarǵa tirkeý tártibi aıqyndalǵan. Oǵan qosa azamattardyń medıtsınalyq uıymdy erkin tańdaý quqyǵy qoldanystaǵy zańnamaǵa sáıkes qamtamasyz etiledi.
- Qurylys jumystaryn skver aýmaǵynyń japsarlas ǵımaratty ornalastyrý úshin qajetti bóligine ǵana júrgizý josparlanyp otyr. Jobany iske asyrý barysynda qoldanystaǵy jasyl jelekterdi barynsha saqtaý kózdeledi. Sondaı-aq joba aıasynda skver aýmaǵyn abattandyrýdy jańartý, onyń ishinde aýmaqty kógaldandyrý, aǵashtar men butalar otyrǵyzý, gúlzarlar jasaý jáne kógal tóseý jumystary qarastyrylǵan. Qurylys-montajdaý jumystaryn júrgizý kezinde qoldanystaǵy qurylys normalary men abattandyrý qaǵıdalarynyń talaptary eskeriledi, - delingen resmı jaýapta.
Eske sala keteıik, budan buryn Oralda emhana aldyndaǵy eski skver joıylyp kete me, osyǵan baılanysty ákimdik jaýabyn jazǵan edik.
Oralda emhana aldyndaǵy skver máselesi qaıta kóterildi.
