Emge aqsha kerek dep 20-dan astam adamdy aldaǵan semeılik alaıaq 21 mln teńge paıda kórgen

SEMEI. QazAqparat – Semeı qalasynda emge aqsha kerek dep 20-dan astam adamdy aldaǵan alaıaq olardy 21 mln teńgege shyǵynǵa batyrǵan, dep habarlaıdy QazAqparat tilshisi.

Qalalyq PB ortalyq polıtsııa bólimine 32 jastaǵy azamat júginip, ózin aldap soqqan beıtanys bireýdiń 2 000 000 teńge mólsherinde materıaldyq zalal keltirgenin jetkizdi. Jedel-izdestirý sharalarynyń nátıjesinde tártip saqshylary 22 jastaǵy jigitti qolǵa túsirdi. Alaıaqtyń basqa da qurbandary kóp bolyp shyqty.

«Kúdiktige qatysty 21 jastaǵy stýdent te aryz jazǵan. Onyń aıtýynsha, olar osy jyldyń naýryz aıynda tanysqan. Birshama ýaqyttan soń, senimine kirgen alaıaq aýyr dertke shaldyqqanyn jetkizip, emge qajetti qymbat dári-dármekterdi satyp alýǵa aqsha suraǵan. Aqshany bir apta ishinde qaıtaramyn dep ýáde etken. Tanysyna kómektesemin sheshken stýdent óz atyna jalpy somasy 449 000 teńgege onlaın nesıe resimdep, onyń qolyna bergen. Ýaqyt óte kele jábirlenýshi aldanyp qalǵanyn túsinip, polıtsııaǵa júginýdi sheshken», - dep habarlady Abaı oblystyq polıtsııa departamentiniń baspasóz qyzmeti.

Kúdiktiniń osyndaı 21 faktige qatysy anyqtaldy. Keltirilgen jalpy zalal somasy 21 000 000 teńgeni quraıdy.

«QR QK-niń 190-baby 3-bóligi 4-tarmaǵy boıynsha sotqa deıingi tergeý amaldary júrgizilýde. Jaýap alý kezinde ustalǵan adam qarajatqa krıptovalıýta satyp alǵanyn aıtty», - deıdi departament bastyǵynyń orynbasary Narıman Kúldikov.