«EMEA Finance» halyqaralyq qarjy jýrnaly Qazaqstandaǵy eń úzdik bankti anyqtady
ALMATY. 16 sáýir. QazAqparat - «EMEA Finance» halyqaralyq qarjy jýrnalynyń jyl saıynǵy sholýy nátıjesinde «Europe Banking Awards 2012» sanaty boıynsha jeńimpazdar anyqtaldy. Onda «Qazaqstan halyq jınaq banki» AQ besinshi jyl qatarynan «Qazaqstandaǵy úzdik bank» dep tanyldy. Al onyń enshiles uıymy «Halyk Finance» AQ «Europe Banking Awards 2012» sanaty boıynsha úshinshi jyl qatarynan «Qazaqstandaǵy úzdik ınvestıtsııalyq bank» retinde jeńimpaz bolyp otyr.
Qazaqstandyq jetekshi qarjy ınstıtýtynyń baspasóz qyzmetiniń habarlaýynsha, basylymnyń shyǵarýshysy ári bas atqarýshy dırektory Krıstofer Mýr: «Qazaqstan 2012 jyly óziniń qarqyndy damýyn jalǵastyra tústi, bank sektory qaıtarylmaǵan nesıeler deńgeıin tómendetýmen áli de kúresip jatqanyna qaramastan, biz jeńimpaz dep tanyǵan Halyq banki bul trendti ózgertti. Banktiń osy atalym boıynsha taǵy da jeńimpaz atanýy tekten tek emes», - degendi aıtqan.
«Qazaqstan halyq bankiniń jáne tutastaı Halyk tobynyń qyzmetine dúnıejúzilik sarapshylar qaýymdastyǵy tarapynan berilip otyrǵan mundaı shynaıy baǵa biz úshin úlken qurmet. Bizdiń búgingi jetistigimiz erteńgi alar belesimizge - Qazaqstannyń bank júıesindegi kósh bastaýshy jetekshilik orynǵa shyǵýǵa jasalyp otyrǵan taǵy bir qadam. Halyq banki men onyń Halyk Finance enshiles uıymynyń dál qazirgi tabysy mundaı kórsetkishterge de qol jetkizýge bolatyndyǵyn aıqyn kórsetip otyr», - deıdi Qazaqstan halyq bankiniń Basqarma tóraıymy Úmit Shaıahmetova.
