Emdeý mekemeleri azamattardy tirkeýden qandaı jaǵdaıda bas tarta alady- maman jaýaby
Spıkerdiń sózinshe, búginde almatylyqtar medıtsınalyq saqtandyrý aıasynda qyzmet alý úshin 71 medıtsınalyq mekemege tirkele alady, onyń ishinde 40 memlekettik jáne 31 jekemenshik nysan bar.
«Tirkeý naýqany kezinde azamattar ózi turatyn aýmaq sheńberindegi memlekettik qana emes, jekemenshik klınıkalarǵa da tirkele alady. Ol úshin emhana medıtsınalyq saqtandyrý qorynyń jetkizýshiler tiziminde bolýy tıis. Atap ótsek, naýqan barysynda emhana aýystyrǵan azamattar ózi tańdaǵan emdeý mekemesiniń qyzmetin 2023 jyldan bastap paıdalana alady. Jalpy, emhana aýystyrý mindetti emes. Burynǵy emhana qyzmetine kóńili tolatyn azamattar ári qaraı da burynǵy klınıkanyń qyzmetin paıdalana berse bolady»,- deıdi Gúlnar Ysqaqova.
Aıtýynsha, ýchaskedegi jalpy praktıka dárigerine tirkelgender sany 1700-den aspaýy tıis.
«Emhana ózi qyzmet kórsetetin aımaqtan tys jerde turatyn azamattardy, sondaı-aq, bastapqy medıtsınalyq-sanıtarlyq kómek kórsetetin mekeme júktemesi shekten asyp ketken jaǵdaıda tirkeýden bas tartýy múmkin. Qoldanystaǵy normatıvterge sáıkes, ýchaskedegi jalpy praktıka dárigerine tirkelgender sany 1700-den aspaýy tıis», – deıdi spıker.
Sonymen qatar, ol bıyl tirkeý tártibine birqatar ózgerister engizilgenin eske saldy.
«Budan bylaı Eýrazııalyq ekonomıkalyq odaqqa múshe memleketterden kelgen eńbek mıgranttary emhanaǵa tirkelý úshin erikti medıtsınalyq saqtandyrý polısin satyp alýy tıis. Olar tirkelý úshin emhananyń tirkeý bólimine baryp ótinish jazady. Tirkeý naýqanyna Qordyń málimetter bazasyna engen emdeý mekemeleri ǵana qatysady. Olardyń tolyq tizimimen MSQ resmı saıtyndaǵy «Emhanany tańdaý» bóliminde tanysýǵa bolady»,- deıdi ol.