Emdelý quny óse me — Densaýlyq saqtaý mınıstrligi jaýap berdi
ASTANA. KAZINFORM — Densaýlyq saqtaý mınıstrligi birqatar buqaralyq aqparat quraldarynda halyq úshin emdeý quny ósedi degen mazmundaǵy aqparattyń taralýyna baılanysty resmı túsinikteme berdi.
— Bul burmalanǵan aqparat ekenin aıtqymyz keledi. Medıtsınalyq qyzmetter tarıfi — bul memleket bekitken somalar. Emhanalar men aýrýhanalar sııaqty medıtsınalyq uıymdarǵa patsıentterdi emdegeni úshin tólenetin qarajat. Bul tólemder Medıtsınalyq saqtandyrý qory arqyly júzege asyrylady.
Máselen, eger azamat medıtsınalyq kómekti mindetti áleýmettik medıtsınalyq saqtandyrý (MÁMS) júıesi arqyly nemese memleket kepildik bergen tegin medıtsınalyq kómek (TMKKK) aıasynda alsa, ol eshqandaı tólem jasamaıdy.
Alaıda bul qyzmet úshin Medıtsınalyq saqtandyrý qory medıtsınalyq uıymǵa bekitilgen tarıf boıynsha aqy tóleıdi. Máselen, operatsııa úshin 50 000 teńge nemese dáriger keńesi úshin 5 000 teńge, — delingen mınıstrlik habarlamasynda.
Mınıstrlik medıtsınalyq qyzmetter tarıfiniń artýy — halyq úshin emdelý baǵasynyń ósýi degendi bildirmeıtinin atap ótti.
— 2025 jylǵy 22 shildede jarııalanǵan Densaýlyq saqtaý mınıstrliginiń baspasóz habarlamasynda («Qoǵamdyq keńeste medıtsınalyq saqtandyrý júıesindegi negizgi ózgerister talqylandy») 2026 jyldan bastap toǵyz negizgi baǵyt boıynsha tarıfterdi kóterý josparlanǵany aıtylǵan bolatyn.
Bul tarıfter 2020 jyldan beri qaıta qaralmaǵan jáne medıtsınalyq qyzmetterdiń naqty ózindik qunyn tolyq jappaıdy.
Habarlamada tarıfterdi ózektendirý statsıonarlyq sektordaǵy sozylmaly qarjylandyrý tapshylyǵyn joıý jáne medıtsınalyq qyzmetterdiń naqty qunyn óteý maqsatynda júrgizilip jatqany atap ótildi, — delingen DSM habarlamasynda.
Densaýlyq saqtaý mınıstrligi bul medıtsınalyq kómektiń sapasy men qoljetimdiligin arttyrý, medıtsına qyzmetkerlerin yntalandyrý úshin atqarylyp jatqan júıeli jumystyń mańyzdy bóligi ekenin atap ótti.
— Azamattar úshin memleket kepildik bergen tegin medıtsınalyq kómek (TMKKK) pen MÁMS paketterine kiretin barlyq qyzmet burynǵysha tegin bolyp qala beredi. Eger Densaýlyq saqtaý mınıstrliginiń resmı resýrstarynda jarııalanǵan aqparat tolyq túsinikti bolmasa, vedomstvonyń baspasóz qyzmetine júginýdi usynamyz, — dedi mınıstrlikte.
Aıta ketelik endi pedıatr balalardy tikeleı qabyldaıtyny týraly jazǵan edik.