Emdelip jatqan depýtattyń shaǵymynan keıin Taraz ınfektsııalyq aýrýhanasy tekserildi
TARAZ. QazAqparat – Facebook áleýmettik jelisinde Taraz qalalyq máslıhatynyń depýtaty, qazir oblys ortalyǵyndaǵy juqpaly aýrýlar aýrýhanasynda em alyp jatqan Elmıra Myrza-Ǵalı atalǵan ǵımarattyń sýyqtyǵyna jáne ystyq sýdyń qalypty deńgeıde berilmeýine shaǵymdanǵan bolatyn, dep habarlaıdy QazAqparat tilshisi.
A talǵan másele boıynsha oblys ákiminiń orynbasary Erjan Jylqybaevtyń tapsyrmasymen arnaıy komıssııa quryldy .
«Máseleniń mán-jaıyn zerdeleý úshin quramynda qoǵamdyq baqylaý jáne monıtorıngilik toptyń Jambyl oblysy boıynsha úılestirýshisi men BAQ ókilderi bar komıssııa músheleri atalǵan nysandy aralap, jylý júıesi men qazandyǵynyń jaǵdaıymen tanysty. Belgili bolǵandaı, búgin tańǵy saǵat 6.30 ben 7.00 shamasynda jylý berý qazandyǵynan aqaý shyǵyp, jylý temperatýrasynyń tómendegeni anyqtaldy. Oryn alǵan jaǵdaı jaýapty qyzmetkerlerdiń kómegimen 1,5 saǵat ishinde qalpyna keltirildi», - delingen oblys ákimdigi baspasóz qyzmetiniń habarlamasynda.
Sondaı-aq, arnaıy qorǵanysh kostıýmderin kıip, palatalardy aralaǵan komıssııa músheleri emdelýshilermen áńgimeleskendigi aıtylǵan. Olardyń sózinshe, palatalardaǵy jaǵdaı turaqty, temperatýra qalypty deńgeıde berilýde.
