«EMA-2017» baıqaýynda Ninety one toby eki júldeni birdeı jeńip aldy
ALMATY. QazAqparat - Almatyda «Qala kúnine» oraı altynshy Eýrazııalyq mýzyka syılyǵy «EMA-2017» baıqaýy ótti, dep habarlaıdy QazAqparat tilshisi.
10 nomınatsııa úshin 30 ártis talasqa tústi. «Internet tańdaýy» nomınatsııasy boıynsha Erke Esmahan jeli qoldanýshylarynyń úzdik oryndaýshysy dep tanyldy. Erke Esmahannyń gastroldik saparda júrýine baılanysty onyń syılyǵyn prodıýser Baıan Maqsatqyzy qabyl aldy.
«Birde meniń úıime keshke jaqyn Erke (Erke Esmahan - avt.) keldi. «Baıan Maqsatqyzy, Móldir Áýelbekova, Kámshat Joldybaevalardyń joly bolyp ketti de meniń nege jolym bolmaı júr. 10 jyl boldy ǵoı júrgenime», - dedi ol. Men saspa, bári jaqsy bolady. Seniń daýysyń erekshe, elenbeı qalýy múmkin emes, sál sabyr qyl degen bolatynmyn. Endi mine, ózderińiz kórip otyrsyzdar, Erke qazir sahnalardyń tórinde júr. Tipti, men onyń syılyǵyn alyp turmyn», - dedi Baıan Maqsatqyzy.
Úzdik «Hıp-Hop» janry boıynsha taǵaıyndalǵan nomınatsııasyn «Baller» jeńip alsa, «Úzdik án» jáne «Úzdik erler ujymy» nomınatsııalaryn «91» toby enshiledi.
«Biz júlde alamyz dep oılaǵan joqpyz. «Sahnaǵa shyqsyn» dedi shyqtyq. Barshańyzǵa alǵys aıtamyz», - dedi toptyń jigitteri.
«Úzdik vıdeoklıp» nomınatsııasy boıynsha «Kental» ozyp shyqsa, «Úzdik oryndaýshy er adam» nomınatsııasyn Álı Oqapov, qyzdardan Lýına jeńip aldy. «Úzdik ujym» nomınatsııasy «BN» tobyna buıyrsa, Aırıı «jyldyń ereksheligi» nomınatsııasy boıynsha úzdik dep tanyldy. Al «Djeıran» toby «úzdik boıjetkender ujymy» nomınatsııasyn enshiledi.
Sonymen qatar, «Úzdik dýet» nomınatsııasy Alan Cherkasov pen Soso Pavlıashvılıge buıyrdy. Shoý bızneske qosqan úlesi úshin Aıjan Nurmaǵambetovaǵa uıymdastyrýshylar tarapynan arnaıy syılyq tabys etildi.
