Em-domǵa kóńili tolmaǵan 66 jastaǵy áıel Taraz aýrýhanasyn jaryp jiberem dep qorqytty
TARAZ. QazAqparat – Tarazdaǵy kópbeıindi qalalyq aýrýhanaǵa «bomba» qoıyldy degen habarlama túsip, patsıentterdi qabyldaý birneshe saǵatqa toqtatyldy, dep habarlaıdy QazAqparat.
Jambyl oblysy polıtsııa departamentiniń baspasóz qyzmeti habarlaǵandaı, 102 nomerine oblystyq ortalyqtyń qalalyq kópbeıindi aýrýhana qyzmetkerinen qońyraý kep túsken.
Qyzmetker belgisiz áıeldiń qońyraý shalyp, telefon arqyly aýrýhananyń bas dárigerimen baılanystyrýyn talap etkenin aıtqan.
Al bas tartqan jaǵdaıda «aýrýhanany bombamen jaryp jiberemin» dep qorqytqan.
Oqıǵa ornyna polıtsııa, tótenshe jaǵdaılar departamenti jáne basqa da arnaıy qyzmetter qyzmetkerleri kelip jetti.
Olar aýrýhana aýmaǵyn qorshaýǵa alyp, qyzmetkerler men patsıentterdi ǵımarattan shyǵardy.
«Qyzmettik ıtter men saperlerdiń qatysýymen oqıǵa ornyn tekserý barysynda aýrýhana ǵımaratynda qandaı da bir kúdikti zattar men qurylǵylar tabylǵan joq. Atalǵan fakti boıynsha QR QK 273-baby (terrorızm aktisi týraly kórineý jalǵan habarlaý) boıynsha sotqa deıingi tergeý bastaldy», – dep túsindirdi vedomstvoda.
Júrgizilgen jedel-izdestirý is-sharalary barysynda qońyraý shalǵan abonenttik nómirdiń ıesi anyqtaldy.
Ol Jambyl oblysy aýdandarynyń biriniń 66 jastaǵy turǵyny bolyp shyqty.
Em alǵanyna kóńili tolmaǵan patsıent «bombamen jaryp jiberemin» dep narazylyq kórsetpek bolǵan.
Qazirgi ýaqytta tergeý amaldary júrgizilýde.
QR Qylmystyq is júrgizý kodeksiniń 201-babyna sáıkes ózge de málimetter tergeý múddesinde jarııa etilmeýge tıis.
