Em alý aldynda dáriger men klınıkany qalaı tańdaý kerek
ASTANA. KAZINFORM — Densaýlyq saqtaý mınıstrligi medıtsınalyq kómektiń qaýipsizdigi men sapasyn qamtamasyz etý maqsatynda medıtsınalyq uıymǵa júginbes buryn onyń qyzmet túrlerine arnalǵan ruqsat berý qujattary men mamandardyń sertıfıkattaryn aldyn ala tekserýdi usynady.
Emdeýdi bastamas buryn myna talaptarǵa nazar aýdaryńyz:
• medıtsınalyq qyzmetti júzege asyrýǵa berilgen qoldanystaǵy lıtsenzııanyń bolýy;
• lıtsenzııaǵa qosymsha — onda sizge qajetti medıtsınalyq kómektiń túri kórsetilýge tıis;
• medıtsınalyq qyzmet kórsetiletin mekenjaı ruqsat berý qujattarynda kórsetilgen mekenjaıǵa sáıkes kelýi kerek;
• kórsetiletin qyzmetterdiń quny, olardy usyný sharttary, yqtımal qarsy kórsetilimder men qaýipter.
Medıtsınalyq uıymnyń lıtsenzııasyn lıtsenzııalar men ruqsattardyń memlekettik elektrondyq tiziliminen eLicense.kz arqyly tekserýge bolady.
Dárigerdi nemese mamandy tańdaǵan kezde mynalardy naqtylańyz:
* medıtsınalyq biliminiń bolýy;
* dárigerdiń mamandyǵy;
* klınıkalyq praktıkamen aınalysýǵa quqyq beretin qoldanystaǵy maman sertıfıkatynyń bolýy.
Mynany este ustaǵan mańyzdy: dıagnoz qoıý nemese dıagnozdy boljamdaý, taldaý nátıjelerin túsindirý, dárilik preparattardy taǵaıyndaý nemese toqtatý, sondaı-aq emdeýdiń jeke shemasyn ázirleý medıtsınalyq qyzmetke jatady. Mundaı qyzmetterdi klınıkalyq praktıkaǵa jiberilgen medıtsına qyzmetkeri ǵana kórsetýge quqyly.
Bul talap áleýmettik jeliler men ınternet arqyly medıtsınalyq konsýltatsııa berý kezinde de qoldanylady.
Kúmán týyndaǵan jaǵdaıda ne isteý kerek?
Shartty, túbirtekterdi, taǵaıyndaýlardy, medıtsınalyq qorytyndylardy jáne mamanmen nemese klınıkamen bolǵan hat-habarlardy saqtap qoıyńyz.
Dárigerlerdiń nemese medıtsınalyq uıymnyń áreketterine qatysty shaǵymmen Densaýlyq saqtaý mınıstrliginiń Medıtsınalyq baqylaý komıtetiniń aýmaqtyq departamentine, onyń ishinde eOtinish júıesi arqyly júginýge bolady.
Aıta ketelik elimizde JRVI juqtyrǵandar sany 1,8 esege azaıdy.
