Eljana kelesi Olımpıadada qýantady — Álııa ıÝsýpova
PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda kórkem gımnastıkadan Qazaqstan komandasynyń bas bapkeri Álııa ıÝsýpova shákirti Eljana Tanıevanyń búgingi jarysyna baǵa berdi.
«Ókinishke qaraı, Tanıeva fınalǵa shyqqan úzdik 10 sportshynyń qataryna ilige almady. Bul — onyń qatysyp otyrǵan alǵashqy Olımpıadasy. Jasy nebári 18-de. Soǵan qaramastan baryn salyp, jaqsy óner kórsetti. Ózi de óte eńbekqor sportshy. Ózderińiz kórgendeı, ol sońǵy urshyq jattyǵýynda sál tómen upaı alyp qaldy. Negizi doppen jattyǵýda óreskel qate jiberip, dopty qolynan túsirip aldy. Al urshyq jattyǵýyn óte taza oryndap shyqqan edi. Bir qyzyǵy, tóreshiler taza oryndalǵan urshyq jattyǵýyna doptan da tómen upaı berdi. Men birden tóreshilerge shaǵym túsirdim. Alaıda, olar shaǵymdy qanaǵattandyrǵan joq. Nelikten mundaı tómen upaı qoıǵanyn túsinbedim. Eljananyń bolashaǵy alda. Buıyrsa kelesi Olımpıada oıyndarynda qýantamyz», — dedi bas bapker Álııa ıÝsýpova.
Sonymen qatar, bas bapker jarys barysynda oryn alǵan taǵy bir qyzyqty oqıǵasyn bólisti.
«Qyzyq, jarysqa bir kún qalǵanda bizde taǵy bir jaǵdaı boldy. Eljananyń taspasynda Road to Paris degen jazý bar edi. Uıymdastyrýshylar bir kún qalǵanda mundaı jazýy bar taspamen jarysqa jiberilmeıtinin aıtty. Al sportshylar úshin ustalǵan, daıyndalǵan quralmen óner kórsetý óte mańyzdy. Tańerteń dúkennen sý jańa taspa satyp aldyq. Biraq bul taspa da jańa bolǵandyqtan, durys ushqan joq. Sodan álem chempıony, ıtalııalyq Sofııa Rafaellıden bir taspa surap aldyq. Sol úshin rahmet aıtamyz oǵan», — dedi bas bapker.
Esterińizge sala keteıik, osyǵan deıin kórkem gımnastıkadan Eljana Tanıevanyń fınalǵa shyǵa almaı qalǵanyn jazǵan bolatynbyz.
