Eljan Birtanovtyń jaǵdaıy qalaı - áriptesi mınıstrdiń densaýlyǵy jaıynda aıtty

NUR-SULTAN. QazAqparat - QR Densaýlyq saqtaý mınıstri Eljan Birtanovtyń densaýlyǵy ortasha aýyr dep baǵalanyp otyr. Bul týraly QR Densaýlyq saqtaý mınıstriniń mindetin atqarýshy Lázzat Aqtaeva aıtty, dep habarlaıdy QazAqparat tilshisi.

«Eljan Birtanov statsıonarlyq em alyp jatyr. Jaǵdaıy ortasha aýyr dep baǵalanady. Ol hattamaǵa sáıkes em alý ústinde. Onyń tezirek saýyǵyp ketýine tilekshimiz», - dedi ol Ortalyq kommmýnkatsııalar qyzmetindegi brıfıngte.

Eske sala ketsek, osydan biraz kún buryn Densaýlyq saqtaý mınıstri Eljan Birtanov Facebook paraqshasynda koronavırýs juqtyrǵanyn habarlaǵan edi.

12 maýsymda QR Premer-Mınıstri Asqar Mamın Jambyl oblysyna jumys saparymen baryp qaıtqan. Onda Densaýlyq saqtaý mınıstri E. Birtanov ta bolǵan. Osyǵan baılanysty Úkimet basshysy oqshaýlanýǵa májbúr bolyp otyr. Áriptesterimen birge Bilim jáne ǵylym mınıstri Ashat Aımaǵambetov, Aýyl sharýashylyǵy mınıstri Saparhan Omarov pen QR Ekologııa, geologııa jáne tabıǵı resýstar mınıstri Maǵzum Myrzaǵalıev, Qarjy mınıstri Erulan Jamaýbaev óz úılerinde oqshaýlandy.