Eljan Birtanovtyń apellıatsııalyq soty taǵy keıinge shegerildi

ASTANA. QazAqparat – Burynǵy QR Densaýlyq saqtaý mınıstri Eljan Birtanov pen onyń burynǵy orynbasary Oljas Ábishevtiń ústinen qozǵalǵan appelıatsııalyq sot taǵy keıinge qaldy, dep habarlaıdy QazAqparat tilshisi.

Búgin Astana qalasy Saryarqa aýdandyq №2 sotynda burynǵy Densaýlyq saqtaý mınıstri Eljan Birtanov pen onyń burynǵy orynbasary Oljas Ábishevtiń isi boıynsha apellıatsııalyq sot ótti.

ZOOM platformasy arqyly ótken sot otyrysy uzaqqa sozylmady.

«Eljan Amantaıuly áli aýyryp jatyr. Emdelý merzimin kelesi dúısenbige deıin uzartty. Sondyqtan apellıatsııalyq sot otyrysyn keıinge qaldyrýdy suraımyz», - dedi E.Birtanovtyń advokaty Serik Saǵalıev.

Óz kezeginde isti qaraýdy keıinge shegerýdi sottalýshy Oljas Ábishev pen burynǵy mınıstrdiń qorǵaýshysy Esjan Birtanov ta qoldady.

«Kelesi sot otyrysy 10 qańtar saǵat 10:00-ge belgilendi. Sot otyrysy oflaın formatta jáne ashyq ótedi», - dedi sýdıa Aıbek Ámirǵalıev.

Eske sala keteıik, Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.

Byltyr qańtarda Eljan Birtanovtyń ústinen qozǵalǵan qylmystyq is sotqa tústi.

2022 jyly 28 qazanda Astana qalasy Saryarqa aýdanynyń №2 soty burynǵy densaýlyq saqtaý mınıstri Eljan Birtanov pen onyń orynbasary Oljas Ábishevtiń isine qatysty úkim shyǵardy.

Burynǵy mınıstr sot sheshimimen kelispeıtinin aıtyp, shaǵym túsiretinin málimdegen bolatyn.

Eljan Birtanovtyń apellıatsııalyq soty munyń aldynda da bir márte aýystyrylǵan edi.