Eljan Birtanov: Jumys isteýge mursat berińizder
«Sońǵy derekter boıynsha elimizde koronavırýs ınfektsııasyn juqtyrǵan 579 medıtsınalyq qyzmetker bar. Jalpy karantın kezeńinde dál osy dárigerlerdiń vırýsty juqtyrý qaýpi joǵary», - dedi Eljan Birtanov Tengrınıýs Instagram paraqshasynyń tikeleı efırinde.
Mınıstrdiń aıtýynsha, qazirgi tańda elimizde koronavırýs juqtyrǵan azamattardyń 80 paıyzy aýrýdy belgisi joq kúıde kóteredi.
«Elde koronavırýs juqtyrǵandar sany az bolǵan kezde bárin testten ótkizýdiń qajettigi týyndamady. Alaıda máselen aýrýhanaǵa qolyn syndyryp túsip jatqandardyń ózinen koronavırýs anyqtalyp jatty. Olardy birinshi qabyldap, emdeıtin dárigerler. Olar osylaısha dárigerlerge vırýs juqtyrýy múmkin. Sol sebepti medıtsına qyzmetkerleriniń aýrýdy juqtyryp alýy bárimizge ońaı tıip turǵan joq. Naýqastarmen tikeleı jumys júrgizip jatqandar da solar. Ekinshiden keı jaǵdaıda sanıtarlyq talaptardyń saqtalmaýy da sebep bolatyny bar», - dedi ol.
Eljan Birtanov dárigerlerdiń koronavırýsty juqtyrýynyń árbir oqıǵasy boıynsha epıdemıologııalyq tergeý júrgiziletinin eske saldy.
«Medıtsına qyzmetkerleriniń naýqastanyp jatqanyn kórip otyrmyz. Alaıda bul máseleniń mańynda qoldan jasalǵan dúrbeleńdi týǵyzbaı-aq qoıalyq. Burys baǵa berýdiń qajeti joq. Zańdy túrde máseleniń anyq-qanyǵyna jetýge mursat berińizder. Bizdiń ǵana tekserýimiz emes, prokýratýra sekildi baqylaý organy da bul máselemen jiti aınalysady. Eń bastysy – aýrýdyń jeńýge mańyz berip, epıdemııaǵa qarsy jumys júrgizýge múmkindik berińizder», - deıdi Eljan Birtanov.